Tura, May 27, 2022: West Garo Hills a•jani NGO-rang jekai FKJGP (Garo Hills Zone), ADE (Apex Committee), AYWO (Central Governing Body), FAF (Headquarter) Tura, a•dokni Home Minister Lakhmen Rymbui-na West Garo Hills-ni DC-ni jak gita Sukrobar salo lekka sedoatenba, West Garo Hills a•jani Suprentindent of Pulis (SP) Vivekanand Singh Rathore-ko kam ra•jitangchina dabiangaha.
“WGH a•jani Pulisrang re•anggipa February jani 13 tariko niam gri biri palgipa sak 6 manderangni kosako suo-moto case-o pangchake badi ka•aha. Uamangni badi ka•anio janapani gitade, Tura songjinmaona GST gamgija birirangko ra•napbaenga. Unbaksana badi ka•ako man•gipa sak 6 manderang baksa tangka gong lak 6 aro bang•a biri bundle-rang baksa rim•chapaha. Ia apsan obostako kobor man•soani ja•mano chinga Rongram bajaroniko sing•sandianiko dakon uamang niam gri GST gamgija birirangko skatang Tura songjinma aro wilwilao donggipa bajar antirangona ra•napbaenga aro dam sea grigipa ba MRP grigipa birirangko palenga ine u•ina gita man•aha. Chinga da•ona kingkingba u•ina gita man•jaenga, 28% GST-ko MRP grigipa bosturangna maidake gamna nangskaaha” ine NGO-rang janapataha.
West Garo Hills a•jao bang•a dokkan dakgiparang beng•ako manie biri palaniko dontongaha. Indiba badiaba dokkanrango srik srik biri palaniko dakengkua. Uandakgipa dokkanrangona re•ange biri dongama ine sing•genchimode, dokkan dakgiparang biri paljaha ine jechaktoka, indiba niam gri Tura songjinmaona aro wilwilao donggipa songrangona birirangko salantian ra•napbaenga.
“Chinga manderangni koborko man•soe, Bristibar salo Rongram bajarona re•ange iani bidingo sing•sandianiko dakahaon bang•a dokkan dakgiparang biri palja ine jechaktoka. Indiba dokkan ning•chi napange sing•sandianiko dakon MRP grigipa biri bundle 276-ko man•aha. Indake chinga ia koborko May 27 tariko West Garo Hills a•jani Deputy Commissioner-na u•iataha. Chingni birirangko ra•e Tura songjinmaona re•bapilmiting somoio, SP an•tangni pulisrangko watate chingko rama tong•soniko rim•e, Tura Pulis Station-ona rimbaaha. Chingaba Pulis Station-ni ning•o dongimin niamrangko ja•rike sing•anirangna bame aganchaka, indiba SP ching baksa dagrange golpoaha aro chingko walsa pulis custody-o donchina ge•etaha. Indiba ma•gipa dolrang aro bang•a chingni ka•rimskarang chingko jokatna re•bae kajia ka•ani gimin chinga pulis custody-o waltuna gita nangjaha” ine NGO dilgiparang parakataha.
“Chingko Pulis Station-ona rimangani ja•mano SP ching baksa ka•sine obostako namgrikna miksonge golpojaha, indiba ua chingko dagrange golpoaha. Uni ning•o donggipa Circle Inspector-an niam gri biri chalan ka•enggipa manderangni kosako suo moto case-o pangchake badi ka•aha, indiba da•ode, chingasa ong•gijako dakengana SP chingkosa dagrange ka•mikkenatani kattarangko aganaha. Uasan ong•aigija Tax gamgijani bidingo Taxation Department-sa nirok sandigenchim, indiba Pulisrangsa ia obostako jako ra•aha aro Taxation Department-ni manderangna ia obostani bidingo u•iatjaha. Chinga sorkarini dongimin niamni kosako re•e kamko ka•na sikja. Indiba SP ia obostani bidingo name sing•sandie, ching baksa agangolpogrike niam gri kam ka•anirangko bon•atna ja•ku de•na nanga, indiba ua chingko A•chik jatni namgnina miksonge kamko ka•enggipa NGO-rangkosa rim•e pulis custody-o walsa donchina ge•etpilaha. Chinga Pulisrangni a•songna jatna kam ka•anirangko nika aro uamangni kamrangna chinga uamangko bilongen mande ra•a. Indiba WGH a•jani SP manderangko dagrange ka•mikkenate golpogenchimode aro kakketna miksonge kamko ka•jagenchim ong•ode, darangba dakchakaniko bi•na pa•jawa. Uni gimin WGH a•jani SP-ko gipin biapchi kam ra•jitangna nanga aro WGH a•jaona dingtang SP-ko ra•baskana nanga” ineba NGO-rang dabiangaha.