Shillong, December 21, 2022: Meghalaya Sorkari a•dokni dingtang dingtang songrangko namroro silroroatna krenge kamrangko ka•engon, Monggolbar salo a•dokni Skotong Minister Pa Conrad K. Sangma, West Khasi Hills a•jao gital Shallang C&RD Block-ko songe on•angaha aro pangkamgipa janggi tangani cholrangko on•na gita tangkarangko aro jila kaanirangko suale on•angjolaha.
Skotong Minister Shallang C&RD Block-ko oprake on•ani somoio jinmana aganprakengon, “Ia Shallang Block-ko songe on•na man•ani gimin anga namen kusi ong•a, ia gital block-o songdonggipa manderang, songtangon bang•a bilko jakkale kam ka•na man•gnok. Manderangni janggi tangani gadangko namdapatna dakchakani ong•gnok aro namgipa sason ka•aniko manderangna sepangbatatna miksongani ong•a. Chingni rakbee kamrangko ka•anichi da•alo, West Khasi Hills a•jao Shallang C&RD Block-ko songe on•na man•aha.”
Shallang C&RD Block-ko Skotong Minister ge 1,594 nokdangrangna ‘FOCUS+’ Farmers’ Welfare Program-ni ning•o gong lak 79.70 tangkarangko sualangaha. Ia ‘FOCUS+’-ko a•bachengatanichi Meghalaya a•dokni pilak Producer Group-rangna namgniko on•na miksonge tariaha. Ian Meghalaya-o game ge•e cha•giparangni dal•batgipa, Welfare Program ong•a. Ia ‘FOCUS’-ara (Farmers’ Collectivization for Upscaling Production and Marketing System)-ni bak ong•a. Ia ge•gni Scheme-rang (Focus aro Focus+) Meghalaya a•dokni game ge•e cha•gipa nokdangrangna nokprako tangka gong 10,000 tangkarangko on•ne namgniko ra•baani ong•a. Una agreba tangka gong lak 39-ko ge 14 Self-Help Group-rangna (SHG) suale on•angjolaha.
Unbaksana Skotong Minister, Rural Backyard Piggerry Scheme, ‘PROGRESS’-ni ning·o, mang 1600 wak bi·sarangko (bima mang-3 aro bipa mangsa)-ko West Khasi Hills a·jani sak 400 game ge•e cha·gipa nokdangrangna sualangaha. Indake apsan somoio Kuroiler do·o, high yielding variety-ko sak 100 manderangna sualangjolaha. Ia PROGRESS Scheme-ara game cha•giparangna dingtang dingtang jilla-kaanirangko on•ne pangkamgipa janggi tangani cholko on•na miksongani ong•a. Ia Scheme-chi sak 10,000 kangal cholgri game cha·giparangna dakchakaniko on·na krengenga. Iani miksongara Meghalaya a·doko wak aro do·o be·enrangko bang•bate bariatna man•gen.
Maina wak aro do•o be•enrangko gipin a•dokrangoniko ra•baesa Meghalaya a•doko bading chiwalniko dakenga, uni gimin a•doktangon chu•onga gita wak aro do•o be•enrangko man•na gita iandakgipa scheme-ko ra•gataha ine Skotong Minister agandapangaha.