Shillong, December 3, 2022: Meghalaya Sorkari a•dokko namroro silroroataniko ra•bana rake aro krenge kamrangko ka•engon, Skoting Minister Pa Conrad K Sangma Sukrobar salo West Ri Bhoi District-o Patharkhmah Civil Sub Division-ko songe on•angaha aro pangkamgipa janggi tangani cholrangko dakna gita tangkarangko sualangaha ine u•iataha.
Pathatkhmah Civil Sub Division-ko songe on•ani salo, “Anga Patharkhmah-ni manderangna kusi ong•chaka maina Pathathmah-ko a•bachengaoni bilsi 27 ja•man, Western Ri Bhoi Administrative Unit-ko gital Patharkhmah Civil Sub Division songe on•na man•aha. Iako dakaniara nabaenggipa Ri Bhoi a•jani Saliramni sima-ario dongenggipa songrangna namroro-silroroaniko ra•bana nangchongmotgipa kam ong•a. Anga iako manderangna minge dakaha” ine Skotong Minister aganaha.
Mande ra•ako man•na kragipa Skotong Minister ‘FOCUS+’ Farmers’ Welfare Program-ni ning•o ge 149 game cha•gipa nokdangrangna tangkarangko sualangaha. FOCUS program-ni ning•o, sak 3518 memborrang donge chu•gimik ge 278 FOCUS PG-rang da•o dipet donga, sak 1150 memborrang donge ge 76 PG-rang tangkarangko man•manaha. Bangki donggipa ge 202 PG-rangni ning•o sak 2368 memborrang uamangni tangkarangko ru•utgija salrangni gisepon man•gen ineba aganangaha.
Ia ‘FOCIS+’ a•bachengo Meghalaya-ni pilak producer nokdangrangna namgniko on•na gita tariaha. Ian Meghalaya a•doko game cha•giparangni dal•batgipa welfare program ‘FOCUS’ ni (Farmers’ Collectivization for Upscaling Production and Marketing System) bak ong•a. Ia ge•gni scheme-rang (Focus aro Focus+) Meghalaya a•dokni game cha•gipa nokdangrangna nokprako gong 10,000 tangkarangko on•ne namgnirangko ra•bana man•gen.
Iana agreba dingtang dingtang Financial Assistance Program-rangni ning•o tangkarangko suale on•aha. Start-up Program-ni ning•o ge 589 SHG-rangna, Rural Finance (RF) Program-ni ning•o ge 568 SHG-rangna, bank loan-ni skanggipa bako ge 390 SHG-rangna aro gnigipa bakko ge 41 SHG-rangna sualataha. Indake ge 674 SHG-rang dal•rorobaenggipa me•chik dolrangni bak ong•a ine janapna gita krabea. Biapni wilwilao donggipa SHG memborrang chu•gimik sak 6087 ong•gen.
Start-up Program-ni ning•o tangkarangko ge 64 Village Organisation (VO)-rangna CIF (Community Investment Fund)-ko ge 30 VO-rangna aro VRF (Vulnerability Reduction Fund)-ko ge 21 VO-rangna sualangaha. (Vulnerability fund-ara VO-rangna on•gipa corpus fund ong•a) Iako nokdangrangni ba songdonggiparangni chagrongenggipa dingtang dingtang neng•nikanirang, jekai cha•ani ringani chu•onggijani, saa-ding•anirang, sagitikani somoio hospital-rango donani, ong•telaigipa a•sel aro uandakgiparangna jakkalani ong•a ine talatangaha.