Williamnagar, July 16, 2022: Swadesh Darshan Project jean Govt of India Tourism department-ni tangkarangko man•ne, Siju Tourist Lodge-ko rike on•anio maming simsak nirokaniko dakjaha aro Lodge-ni pakmarang bilsi ru•utgijan an•chengrang pakmarango ong•kataha ine Niksamso A•chik Society (NAS) Garo Community Organization parakataha.
“Chingni re•ange nianio nikna man•aha, indake a•songna on•gipa development-ko name rikgija tangka paisarangko chu•onggija jakkalaniara kraani ong•ja. Gipin biaprangoni songre songabatgipa tourist-rang sakanti uano dongchakna waltuna kenani donga. Maina ka•mabatgipa pakmarang mangrakatjaode Siju lodge be•grunaba donga” ine NAS-ni President Tengrak Marak parakataha.
Bang•a development-ni scheme-rangko name jakkalgija kamko ka•ani a•sel da•alo indakgipa obostarangko nikna man•ani gimin NAS suk suk ong•gijaniko parakataha. Siju lodge baksana songe channe on•chakna rikgipa babilsini pakmarangba nosto ong•aha aro iako rike matchotani bilsi 2-san ong•engachim, indiba da•on indakgipa obostarangko nikna man•aha. Iako rikanio chu•onga gita nanga bosturangko on•jani a•sel jolni dilgiparang baksa chanchie bang•a sorkarini development-na on•atgipa scheme-rangniko cha•bokenga ine ma•sina man•aha.
Uni gimin iandakgipa kamrangko ka•giparangni kosako raka ja•kuko de•na nanga, jedakode kamni kri sastiko man•china. Sorkariko chalaienggipa skotong Minister an•tangan indakgipa obostarangko nirok sandie namdapatna nanga. Uandakgipa kamrangko nirok simsakjani a•sel dal•dalgipa project-rangko nosto ka•engani gimin department-ni officer-rang, political dilgiparangni kamko NAS raken jegalataha.