Shillong, October 29, 2022: Shillong Press Club (SPC) 28 tariko ong•anggipa obostako raken jegalataha.
“Chinga Shillong Press Club 28 tariko ong•anggipa obostako raken jegala. Federation of Khasi Jaintia and Garo People (FKJGP) dolni a•doko kamgri roenggipa chadamberangna chakpaaniko mesokna jinma re•jomaniko ong•atgenchimoba, uamang Mothphran-oni Madan Iewrynghep-ona re•jomangmiting somoio FKJGP dolni mitam manderang Dhanketi-o manderangko dokpetpete donangaha. Doka man•gipa manderang ramakosa re•angengachim aro soroko scooty ba gari salgenchimoba uamangna jite on•engachim. Indiba dosgri manderangko skatang doke sataniko chinga ra•chakna man•chongmotja” ine Press Club jegalataha.
FKJGP-ni President tom•aniko ong•atgipa a•damo jinmana aganprakenba mitam ka•rimskarangni palo kemako bi•angaha. Uni aganani gitade, uamang re•jomaniko dakna skangan tom•tome re•jomanikosa dakgen aro darangkoba dokna satna man•jawa ine ge•etahachim. Indiba an•chi ding•e dongenggipa manderang beng•ako manigija ramako re•angenggipa manderangko dokpetpete donangaha, uamangni palo anga jinmao kema bi•na sika ine aganaha.
Doka satanio jak donggipa manderang niam sastiko man•na nanga. Unbaksana pulisrang ong•anggimin obostako ramram ong•e ra•aigija, bimchipe kamko ka•enba dos dakgipa manderangko sandina nanga ine SPC dabianaha.