Williamnagar, March 30, 2023: East Garo Hills a•jani nangrimgimin NGO-rang jekai GSU, FAF, AIGU, AAYF, WGCSU aro Sumo-Pickup Association a•doko Roster System-ko ra•galna nangja ine dabiangaha.
Roster System-ko jegalaniara jatska jat melie nangrime donganiko gisik sagrikaniko ra•baa. Meghalaya a•dokko man•chengaoni, Job Reservation Policy donggenchimoba, A•chik jat man•gnirangko chu•onge man•rongja. A•dokni bang•a Directorate Office-rango A•chik jatni chokkio asongako nikna man•ja. Kam ge 100-oni ge 10-osan A•chik jatko seokaigen. Indake bang•a Department-rango A•chik jatko nikna man•srangja. Indiba iarangni bidingo NGO-rang mamingkoba aganchakgija, jatska baksa golmal kajia ong•aniko nangnikjae, High Court-ni niamo chu•gimik pakwate jrip dongaiachim. Indiba da•alo A•chik jatko onchepna aro kal•stekna ja•ku de•aniko NGO-rang chakchikjawa. NGO-rang Roster System-ko ra•galjachina dabianggen aro raken ja•ku de•anggen ine parakataha.
Uni gimin jatsa jatgipin baksa meli nangrime donganiko kajia ong•aniona sokatjachina kattarangko aganengon, simsake aganna nanga. Unbaksana Roster System-ko maming dakeba ra•galna nangja, jedakode pilakan apsan man•gni kamrangko man•pana nanga ine East Garo Hills a•jani NGO-rang didiataha.