Rama dongjani a•sel songni manderang sagipa manderangko wa•chapo chillanga
Baghmara, July 11, 2022: South Garo Hills a•jani ning•o donggipa Dabit Simragittim songni manderang sagiparangko hospit ra•angna maming chol dongjae, saenggipa me•chik saksako wa•ako kachape tarigipa wa•chapo ba km 12 ong•gipa ramako ja•achi Dumnikura bajarona chilangaha ine kobor man•aha.
Indake Dumnikura bajaroni saenggipa mandeko Hospital-ona gario ra•angaha.Ia obostani bidingo A•chik Organization for Social Welfare (AOSW) suk ong•gijaniko parakataha.
“Saenggipa mandeko indita chel•begipa ramako, ja•achi ra•anganiara ramram katta ong•ja. Uamang chiring chibisikrangko gabate, burung bolgrimrangko watchange, sal ding•ako ding•a minggija sagipa mandeko an•sengatna dakchakaha. Diltugipa songni dilgiparang nirok sandina nangchongmota, eleksinni somoiosan ong•aigija indiba uamangni neng•nikanirangko dakchakna nanga” ine AOSW ni Vice President Gripping Marak janapaha.
Dilgiparang simsakjani a•sel Garo Hills da•onaba tang•dodapaniko man•jaenga aro uandake diltubegipa songrango songdongenggipa manderang galchipako aro maming dakchakaniko man•rongja.
Meghalaya a•dok bilsi 50 gaplaha, indiba bilsi 50-ona kingkingba maming namdapani aro dingtanganiko man•kuja. Batanggimin aro da•o ong•enggipa CM, MLA, MDC-rang an•tangtangni kamko ong•e nikengama. Uandake Garo Hills-ni pilak a•jani manderang dilgiparangni kamna kusi ong•tokaiama? An•chingara dilgiparangni jakchi cha•bokako man•ona kingkingba apsan dilgipako seoktaipilgenma ine Gripping Marak sing•doangaha.
“Chinga mandetangna ka•sagijagipa, a•dok chigana ka•sagijagipa mandeko dilgipa ong•na seokpiltaina sikja. Chinga dilgiparangni galchipe donaniko raken jegala. Songni nokni neng•nikanirangko aro nangnikanirangko chu•sokate on•na dilgipani jakon ong•a, indiba dilgiparangan indake manderangko galchipe donggenchimode bano aro sano ka•dongbo” ineba janapataha.