Tura, Feb 8, 2023: Phulbari elakkani ning•o donggipa Charbatapara polling booth-o NPP-na kam ka•giparang TMC dolni kam ka•giparangko Monggolbar walo chadrapaha ine kobor man•aha.
Kobor man•soani gitade, ia a•sel walni 10:30 bajimango TMC dolni meeting ka•mitting somoio NPP-na kam ka•gipa manderang rang•san re•bae meetingna tarigipa pandalko chadrape nosto ka•na a•bachengaha.
NPP-na kam ka•giparang TMC-ni meeting ka•gipa biapona jinma re•bae kajia a•boteaha. Indake NPP-ni manderang rang•san meetingko chadrape, ro•ong goruruani a•sel bilsi 59 ong•gipa Nozrul Hoque saknaako man•aha. Bakan Nozrul Hoque-ko ka•rimskarang Phulbari CHC-ona ra•angaha.
Ia a•sel ong•aniko kobor man•soe TMC candidate SG Esmatur Mominin, kam ka•rimskarango call ka•e sing•aton, saknaa man•gipa TMC-na ka•gipa bilongen mata buako man•aha ine aganataha.
Ia a•selni bidingo Mominin, NPP-na chakgipa manderangni namgijagipa kamko raken jegalataha aro ka•pong manderangsa indake namgija kamko ka•a ine matnangataha. NPP-na kam ka•giparang re•baenggipa election-o NPP candidate AT Mondal cheteljawa ine nikesa TMC-na kam ka•giparangko kajia a•bote saknaatenga ineba janapataha.