Shillong, September 12, 2022: West Jaintia Hills a•jao donggipa Jowai pattokoni joke katgipa sakdok koedirangoni sak briko Robibar salo Shangpung songni manderang jinma dokgrime siataha ine koborna parakataha.
Doka man•gipa koedirangoni saksade, I Love You Talang ong•a jekon pulisrang taxi driver sakgniko so•otanina rim•ahachim. Unbaksana so•otanio jak dongpagipa Ramesh Dkhar-ba kate jokahachim, indiba pulisrang Sombar salo rim•taiaha ine koborna parakataha.
Indake uamang baksa pattokoni katchapanggipa saksa Rikamenlang Lamare-ko da•onaba rim•na man•kujaenga ine u•iataha.
Koborna u•iatani gitade pattokoni joke katgipa sakdok koedirang Shangpung kolege-ni sepango donggipa buringo donnue dongengachim. Indake uamangoni saksa Ramesh Dkhar Robibar attamni 3 bajimango dokkanona re•ange cha•anirangko breengmiting somoio songni manderang uko nike ma•siaha. Indake nikgipa manderang songni manderangna koborko on•ataha. Koborko man•soani bakan Shangpung, Thadmuthlong aro uni wilwilao donggipa songni manderang tom•batokaha. Indake uamang Shangpung kolege janggilo donggipa buring gita janggitangko jokatna kenne katangako songni manderang jinma changdule uamangko ka•saninggija dokgrimahani gimin sakbri koedirang janggitangko gimaataha. Indiba Ramesh Robibar salo ua manderangoni joke katna man•aha.
Pulisrang jemangan ua a•damona re•angahachim, uamang doka man•gipa manderangni manggisiko Jowai Civil Hospital-ona Identification-na ra•angaha. Doka man•gipa sakbri koedirang sakgipin mandeni janggiko so•ote galanina pattoko dongengachim. Uamangoni saksa Marsanki Tariang jean re•anggipa 2015 bilsini March 19 tariko jiktangko manggitang wa•alchi so•e galahachim.