Tura, May 27, 2022: West Garo Hills a•jani bang•a NGO-rang FKJGP, ADE Apex Committee, AYWO aro FAF, manderangni kobor on•atako man•soe, Bristibar salo Rongram bajaroniko MRP grigipa birirangko sandie ra•sekaha ine WGH a•jani Deputy Commissioner Swapnil Tembe-na Sukrobar salo lekka seachi parakataha.
“Bang•a manderang chingna MRP grigipa birirangko Rongram bajaro palenga ine u•iataha. Koborko man•soani gimin chinga Bristibar salo Rongram bajarona re•ange sing•sandianiko dakeaha. Dokkanrango sing•sandianiko dakon uamang biri palja ine jechaktokaha. Indiba dokkan ning•aoniko sandion M/s Ram Brich Sah, Chotelal Sah aro Jitender Sah-ni Godown-oniko MRP grigipa birirangko man•aha. Chinga dokkan dakgiparangni mikkangon ra•seka man•gipa birini packet-rangko channe ra•baaha. M/s Ram Brich Sah-ni dokkanoniko Pradip Biri bundle 147-ko man•aha, Chotelal Sah-ni dokkanoniko Pradip Biri bundle 111-ko aro Jai Hind Biri bundle 3-ko man•aha, indake Jitender Sah-ni dokkanoniko Pradip Biri bundle 15-ko man•aha” ine NGO-rang koborna parakataha.
Bagan bari ba a•bani bosturangna agre bajaro palgipa gipin bosturango Maximum Retail Price (MRP) ba dam sea dongna nangtela. Indiba bang•a manderangni u•iatani gitade, Rongram bajaro MRP grigipa birirangko palenga. Iani bidingo NGO-rang dokkan dakgiparangna u•iatgija sing•sandianiko dakna re•angaha aro uamang MRP grigipa biri bundle chu•gimik 276-ko man•baaha. Ia obostarangni bidingo nirok sandina nangchongmota aro niam gri palenggipa manderangni kosako ja•ku de•na nangchongmota ine NGO-rang dabiangaha.