Resubelpara, May 22, 2022: North Garo Hills a•jani NGO-rang A•chik Youth Welfare Organization (AYWO), A•chik Holistic Awakening Movement (AHAM), Garo Students Union (GSU) Achotchonggre Unit, GSMC Pedaldoba Regional Unit-ni Chairman Rimjen Ch.Sangma-ni dongpanio bang•a songni Nokma-rang aro manderang apsan nangrime May 21 tariko Achotchonggre Community Hall-o tom•e chsnchirimaniko dake North Garo Hills a•jani Deputy Commissioner-na lekka sedoataha.
Ia tom•anio Contractor-rangni Gokolgre songoni Achotchonggre songona tarianggipa PMGSY rama namgijani bidingo chanchirimaniko dakangaha.
Indake NGO-rangni DC-na seatgipa lekkao janapatani gitade Gokolgre songoni Achotchonggre songona rama tarina gita Ma Rotnilla B. Marak contract man•aha, indiba ua kamtangko name ka•jahani a•sel manderang bang•a neng•nikaniko man•aha.
Uandake 2018-19 bilsio Pradhan Mantri Gram Sadhak Yojana (PMGSY)-ni gita apsan contract-ko tender on•taiani somoio Manipur-ni saksa Contractor Deepen Singh ia kam-ko man•skaha. Indiba kamrang namen ka•sindugae bilsi 5 ong•piloba kamrangko matchotkujachim.
Ia kamko bilsi 5-o matchotchina ge•etaniko on•aha aro niam gita re•baenggipa December jani 31 tariko matchotatna nangengachim.
Indiba Contractor-rang ia kamko matchote on•na gisiko nangjaengani a•sel manderang mikka wachini somoio neng•nikaniko man•ronga. Dam 40 songni manderang ia ramao pangchake janggi tangenga, indake ong•engon mikka wachini somoio songni manderang ia namgijagipa ramani a•sel neng•nikaniko man•a.
Manderangni chagrongenggipa obostarangko nigrike sorkari Contractor-rangko kam name ka•china didina nanga ineba NGO-rang janapataha.