Williamnagar, May 13, 2022: Niksamso A•chik Society (NAS), Garo Community Organisation dolni sak 5 dilgiparang Sukrobar salo kamtangoni bimingtangtangko den•galaha ba kam wataha ine koborna parakataha.
“NAS doloni ong•katgipa sak 5 manderang ia dolko bikote on•gipa manderangba ong•a ine parakataha. Uamanga Premiar N. Sangma General Secretary, Joshua Ch. Marak Publicity cum RTI Secretary, Gripping B. Marak Vice-president, Walsrang Momin- Financial Secretary aro John Peter Momin- Environmental Secretary ong•achim.
Premiar N Sangma, doltangna bimchipe kamko ka•gipa ong•achim. Ua dolko nirok sandian baksana President aro gipin membor-rangko kam ka•ani bidingo skie on•rongachim. Ua saksa u•i-ma•sigipa NGO dilgipaba ong•achim. Ua ong•a ong•gijako nigrikesa kamrangko ka•ronga. Indiba da•al salo ua kamtangoni neng•takaha” ine koborna parakataha.
Joshua Ch Marak NAS dolo Publicity cum RTI Secretary-ni kamko ka•e NAS dolo ong•gijagipa kamrangni kosako bang•a RTI-rangko ka•angaha aro nanga documents-rangko bikotenba uko President Tengrak R. Marak-na on•ne talbate u•i-ma•sina Spot enquiry-na watronga. Dolni gita Press Release-rangko aro Memorandum-rangko English ku•sikchi pangnan uasa seronga. Indiba uaba kamtangoni neng•takaha ine koborna parakataha.
Uandake Gripping B. Marak-ba Vice- President ong•e kamtangko name ka•rongachim.
Ua tom•bimongani somoirango NGO dolko bang•a changon represent ka•ronga. Ua East Garo Hills a•jao Jal Jeevan Mission (JJM)-ni corruption-ko nirok sandiaha. Indiba ua neng•nikanirangko man•ne kamtangoni ong•kataha ine parakataha.
Uasan ong•aigija Walsrang Momin Financial Secretary-ni kamko name ka•aha. Ua ge•etatangko name ka•an baksana una on•gipa kamrangko je•chakrongjachim. Uni aganani gitade, ua NAS Financial Secretary ong•e kamko ka•gengon President-ni gita sokbaenggipa tangka paisani bidingo una mamingan dongja. Indake uaba kamtangoni ong•kataha. Aro John Peter Momin Environmental Secretary-ni kamko ka•e wilwilao nikenggipa obostarangko nirok sandian baksana kamtangko gisik nange bimchipe ka•gipa ong•achim. Indiba ua an•tangna neng•nikanirangko man•ne kamtangoni nengtakaha ine parakataha.