Resubelpara, Mar 27, 2023: North Garo Hills a•jao ge•sa gitchambatsranggipa Mendipathar Secondary Skul building gitalko ru•uta bilsirangna rikgija galchipe donenggipa Contractor-ko Niksamso Garo Community Organisation (NGCO), HQ Simsanggre matnangaha.
NGCO-ni parakatani gitade, Mendipathar Secondary Skulko 1972 bilsio kuliaha. Ua skul da•o bilsi 51 gapaha. Sorkari ua Skul Building-ko rikna gita tangka paisarangko chamataha, indiba contractor cha•boke, development-na on•atgipa tangka paisarangko skatang jakkale bon•atahani gimin NGCO suk ong•gijaniko parakataha.
Sorkari iani bidingo maming nirok sandianiko dakjani gimin, contractor kam ka•gija tangka paisarangko jakkale bon•ataha. Uni gimin sorkari ta•rake iani bidingo nirok sandianiko dakenba, cha•bokgipa contractor-ni kosako rakgipa ja•kuko de•angchina NGCO dabiangaha.
Ua skul building-ko 2012 bilsion matchotani ong•achim, indiba da•alona kingking matchotgija galchipe donenga. Indide ua skul building-ko rikna on•atgipa tangka paisarang batchi gimaskaenga ineba NGCO sing•doangaha.
NGCO indakgipa contractor-ni kamko maming saloba ra•chakna man•jawa ine parakataha.
Iani bidingo gital dake dabitaioba maming kobor dongja. Uni gisepon Skul Headmaster-ni NGCO-na talatani gitade, skul nok gitcham ong•ahani gimin bang•e baijawaha, gital building-ko nangchongmotenga, maina chatro chatrirang neng•nikaniko man•enga.
Indake ong•engon, NGCO-ni re•ange nianio nikani gitade, skul nokni pakmarang gimikan nosto ong•aha aro ru•uta bilsirangonin maming taridapa dongja. Sorkarini on•atgipa kamrangko contractor ka•gija nosto ka•aha. Uni gimin development-ko rusigipa contractor-ko mikkang niani dongjawa ine parakatenba, ta•rake nirok sandianiko dakchina NGCO sorkariko didiangaha.