Kamrup, Mar 30, 2023: Assam aro Meghalaya sima ario donggipa Malchapara songni manderang sak 2-ko Assam Pulis rim•aha ine kobor man•aha.
Ia a•selara Malchapara songo donggipa Meghalaya a•dokni manderang baksa Assam a•dokni manderang baksa melina man•jae, adita salna skang Meghalaya a•doko ga•akgipa Malchapara songni mande saksa Chewan Sangma chu ringe songona re•angmitting somoio Assam a•dokna chakpagipa manderangko skatang chonikani a•sel ong•ahachim.
Indake Chewan Sangma-ni ringe cha•e, kajia ka•ani bidingo Assam-ni manderang Pentom Marak, Sehen Marak, Manrik Sangma Chanchan Marak, Chewan Sangma-ko dokaha. Chewan Sangma an•tangko dokani gimin Assam-ni sak 2 manderangko dokskaha.
Uandake Assam-ni manderangko dokani gimin Meghalaya-ni manderang jinma rikangahani gimin Assam-ni manderang Assam Pulisrangko okamataha ine koborna u•iataha.
Chewan Sangma-ni dokatgipa sakgni manderangko Assam-ni Pulisrang Medical check-up ka•e, uni kosako badi (FIR) ka•aha. Indake badi ka•anio Chewan Sangma aro dos grigipa Sixstar Marak-ko Assam Pulisrang rim•aha.
Iandake ong•engon, Assam-ni manderangko, Meghalaya-ni manderang chadrapaha, ine matnangeenba Meghalaya-ni sak 25 dos grigipa manderangko badi ka•aha.
Maming dos griko badi ka•e biming segatako man•gipa Meghalaya-ni manderanga Star R Marak, Anup Sangma, Grenpitar Sangma, Epal Sangma aro Mecken R Marak ong•achim.
Indake kajia golmal ong•ani bidingo Meghalaya-ni manderangko badi ka•na gita, GSU Hahim Unit, tom•e chanchirimaniko dakaha ineba u•iataha. Assam aro Meghalaya-ni sima ario donggipa manderangni gisepo kajia golmal ong•engon, Malchapara songni nokdang te 40 Assam-na chakgiparang aro nokdang te 70 Meghalaya-na chakgipa manderang meligrikna man•jaengani gimin Meghalaya-ni manderang songo noko tom•tom dongna man•gija so•sojengjeng ong•enga ine parakataha.
Assam a•dokna chakgipa manderang tol•e badi ka•ani a•sel, Malchapara songni manderang pulisna kene katjengjenge dongna nangenga.
Ia a•selni Bidingo Meghalaya-ni NGO-rang ta•rakale nirok sandianiko dakenba dakchakpachina Malchapara songni manderang mol•molataha.