Me•chik saksa bi•sa sak 3-ko atchiani ja•man, okningo dongkuenggipa saksako atchigija sianga
Tura, Mar 30, 2023:Garo Hills-o ong•ronggija obosta aro knaronggijagipa a•sel ong•aha ine koborko man•soaha.
Kobor man•soani gitade, West Garo Hills a•jani Tikrikilla Pulis Station-ni ning•o donggipa Jengrip songo ma•gipa saksa sakgittam bi•sako atchiani ja•mano, okningo dongkuenggipa bi•sa saksako atchigija janggi galangaha.
Jengrip songona Tikrikilla Pulis Station-oni kilomiter 4 ba 5 mang chel•achim, ua songo indakgipa obosta ong•aha, ine Tikrikilla-ni saksa gitcham NGO dilgipa koborko on•ataha.
Bilsi 25 ong•gipa Ma Rena N.Sangma ia obostako chagronge, an•tangni ka•sagipa ma•a paa, segipa, dedrang aro mahari ma•drangko wate jringjotna nengtakram biapona re•angaha.
Atchigital sakgittam bi•sarangni ma•gipa a•gilsako wate re•angahaoba, bi•sarang sakgittaman an•senge dongkuenga ine koborna u•iataha.