Ma•mong sorkarini on•atenggipa scheme-rangko jakkalani bidingo Union Minister nipilanga

Tura, January 8, 2022: Union Minister of State for Minority Affairs, Govt of India, John Barla Sonibar salo Tura Circuit House-o pilak sorkari Department-ni Head Officer-rang baksa tom•aniko ong•ate, ma•mong sorkarini scheme-rangko aro uamangni kam ka•anirangko nipilangaha.

Ia tom•anio John Barla jinmana aganprakengon, “Department-ni dilgiparang ma•mong sorkarini bidana, a•jako tang•doatna aro songna nokna on•atgipa scheme-rangni bidingo talate on•angaha. Unbaksana kamtangko name ka•e a•jani namgnina aro silroro namroroanina ja•ku de•na nanga. Ma•mong sorkari a•dokni manderangna bang•a scheme-rangko bikote on•atenga. Minority Community-o ga•akgipa manderangna sorkari scheme-rangko bikotaha, indiba scheme-ni namgniko man•na maiko dakna nanga aro maidake bimingtangko segatna nanga, uarangni gimin ma•sija. Uni gimin pilak Officer-rang ia scheme-rangni bidingo uamangna agan talate on•na nanga” ine aganangaha.

West Garo Hills a•jani Deputy Commissioner Swapnil Tembe, District Profile-ko mesokan baksana Jal Jeevan Mission, Aadhar Enrolment, Institutional Delivery-rangni Progress Report-ko mesokangaha. Apsandaken DRDA-ni Project Director Dolrich G Momin PMGSY, PMAY, Amrit Sarovar Scheme-rangko a•doko kam ka•ani bidingo talatangskaha.