Tura, May 29, 2022: All Mallangkona Area Development Organisation (AMADO) aro Mallangkona Joint Action Committee (MJAC)-ni dilgiparang sima ari jolrango neng•nikanirang batroroengani gimin Garo Hills-ni NGO-rang FKJGP, ADE, FAF aro AYWO-ni dilgiparangko gronge uamang baksa Sonibar salo chanchirimaniko dakangaha.
Sima ario dongenggipa manderang re•anggipa March 29 tariko Meghalaya aro Assam a•dokni Skotong Minister Conrad Sangma aro Himanta Biswa Sarma, Ma•mongni Union Home Minister-ko gronge, sima arini kajia golmalko namatna Memorandum of Understanding (MoU)-o soi ka•enba Khasi Hills a•jao songdongenggipa adita A•chik songrangko Assam-chi chapatani a•sel sima ario songdongenggipa Meghalaya a•dokni A•chikrang duk mikchi ong•e so•sojengjeng Assam pulisrangni sinjetaniko on•engani gimin, Garo Hills-ni NGO-rangko ia obostani bidingo dakchakaniko on•pachina AMADO-ni Vice President Enosh Momin mol•molangaha.
Enosh Momin-ni parakangani gitade, da•alona kingkingba Conrad Sangma sima ario neng•nikaniko man•enggipa manderangni mol•molako knachake kamko ka•kuja. Uni gimin ia neng•nikani bidingo dakchakaniko on•pachina NGO-rangko mol•molangaha.
Garo Hills-ni NGO dilgiparang kobor ra•timgiparangna aganengon, soi ka•gimin MoU-ko nipiltaichina Skotong Minister Conrad Sangma-ko mol•molataha. Maina MoU-o soi ka•anio bang•a gualanirang ba daksretanirang gnang, uni gimin jegitaba MoU-ko nipiltaina mol•mole message-ko on•ataha. Uni gisepon, NGO-rangni mol•molako knachakja ong•ode aro soi ka•gimin MoU-ko nipiltaie kajia golmalko namatpilja ong•ode, NGO-rang raka ja•kurangko de•e dakgrikanggen ine parakataha.
MoU-o soi ka•na skang Conrad Sangma-ni ku•rachaka gita kamko ka•jaha aro manderangni nangnika gitasa kamko ka•gen, ingipa kattarang mingsaba ong•jaha ine Enosh Momin aganangaha. Conrad Sangma Regional Committee-ko songe, pilak kamrangko ka•a matchotani ja•mansa MoU-o soi ka•gen ine ku•rachakachim, indiba Regional Committee mai kamko ka•e report-ko on•aha. Songni mamderangko, Sordarship, Himaship aro District Council-ni dilgiparangko changsaba gronge agangrikgija MoU-o soi ka•aha ineba Enosh Momin agandapangaha.
Indake ong•engon, Mallangkona-ni dilgipa Enosh Momin-ni mol•molanga gitan Garo Hills-ni NGO-rang ia sima ario ong•enggipa obostani bidingo raken ja•kurangko de•anggen ine ku•rachakataha.