Shillong, March 28, 2023: A•chik ku•sikko 8-gipa Schedule-o ra•gataniko man•na chu•onggijanirang donggenchimode, Khasi ku•sikko maming salonrika gri ra•gatchina, Khasi Authors Society (KAS)-ni General Secretary RP Kharshing parakataha.
8-gipa schedule-o ra•gataniko man•genchimode, India a•songo official status-ko man•an baksana, IAS porikkarango Khasi aro Garo ku•sikchi sing•anirangko aganchakna man•genchim. KAS-ni dilgiparang, Khasi ku•sikko ra•gatchina nanga gita documentation-rangko tarie New Delhi-ona re•anggen ineba u•iataha.
“Chinga chu•onga gita documentation-rangko tarie Delhi-ona re•angenba Ministry-ni manderangko grongegen aro chingni dabianirangko ta•raken knachakchina mol•molangen. Meghalaya a•dok sorkari Garo aro Khasi ku•sikko 8-gipa schedule-o ra•gatchina resolution-ko pass ka•atgenchimoba, ma•mong sorkari ra•chakujaenga” ine Kharshing agandapataha.
Unbaksana 8-gipa schedule-o ra•gatna, ming 38 ku•sikrangko chamaha, jeon Khasi ku•sik bak donga, indiba Garo ku•sik dongja. Uni gisepon, ge•gni ku•sikrangko apsan dabiani a•sel Khasi ku•sikko ra•gatna neng•nikani ong•enga. Khasi ku•sikko 8-gipa schedule-o ra•gatna gita maming salonrikani aro jajaatani dongna nangja. Niatgenchimode, Assam a•doko Bodo ku•sikna skang Assamese ku•sikkosa ra•gatchengaha. Khasi aro Garo ku•sik, ge•gniko joljol ra•gatna man•genchimode, a•dokna katchabeani ong•genchim, indiba Meghalaya chonbegipa a•dok ge•gni ku•sikrangko apsan ra•gatna Ministry-ni manderangna neng•nikani ong•enga ineba Kharshing japataha.
“8-gipa schedule-o ra•gatna pilak nanganirang Khasi ku•siko donga. 2011 Census-ni gitade a•dokni sak 1.5 million manderang Khasi ku•sikko agana. ku•tangni jat tangni oikor donga, PhD level onaba poraina man•a, unbaksana Assam aro Bangladesh a•songni mitam bakrango Khasi ku•sikko agana” ineba agandapaha.
A•dok sorkarini pass ka•gimin, resolution-ko bilakdapatna gita chinga Delhi-ona re•ange Ministry-ni dilgiparangko grongegen ineba u•iataha.