Jengjal jolni NGO-rang da•ororo ong•enggipa oboatarangni bisingo tom•e chanchirima
Tura, June 12, 2022: Jengjal jolni nangrimgimin NGO-rang GSMC, FKJGP, ADE aro GSU Sonibar salo Jengjal, Anogre, Dollonggre, Waribok jolni Nokmarang songni nokni Secretary, President-rang aro songni manderang apsan ku•monge, da•ororo Garo Hills-o ong•enggipa obostarangni bidingo tom•e chanchirimaniko dakangaha.
Jedakode, mikkangchi joltangtango chel•chaksoaniko dakna man•gen. Uni gimin A•chik chadamberang gipin jatrangni kragija kamrangko ka•enggipa jekai rim•sruke ra•ani, mal gamrangko ra•e katani, jik sekani, til•ek an•chadraanirang aro gipin dingtang dingtang namgijagipa kamrangko ka•engani gimin uarangko chel•chaksona raka niamrangko donne mikkangchi ja•ku de•aniko dake songo noko tom•kae, songantion niamrangko donna chanchirimaniko dakangaha.
Iarangni bidingo Nokmarang, songni nokni President Secretary-rang aro songni manderangrang namnike tik ka•angaha. Ia jolrango ku•rachakgimin ba ra•chakgimin niamrangara
Skanggipa gipin jatrang songo noko nape sikatang bading chiwalna man•jawa aro songni Nokma, President Secretary-rangni ge•etaniko man•gija aro Trading Licence donggija dongkame aro nape badingna man•jawa.
Gnigipa, songo noko gipin jatrang ba chel•a biaponi A•chikrang kam ka•na re•bagiparang nok para donggiparang, Nok rikgipa mistry, bol ratgipa mistry aro je kamko ka•giparangba songni Nokma, President aro Secretary-rangni ge•etaniko man•gija, nok nokgiparangna sorkarini on•gipa ID proof jekai Aadhaar card, Voter ID card-rangko sakprakan zerox ka•e on•na nanggen, jedakode maiba a•sel ong•genchimode, songna nokna neng•nikaniko ra•baan salo altuae sandina gita man•gen.
Gittamgipa, Songo Noko me•chikrang gipin jatrangko segipa ba jikgipa ra•e chawari rimbagiparangko songo noko raka ja•ku de•aniko dake Nokmarang mikangchi, uamangna maming dakeba cast certificate, birth certificate-na document-rangko on•jawa. Songo nokoba rakkijawa ine Nokmarang ku•rachakangaha.
Brigipa, bajar antirango skang dongsogiparangna agre gital re•bagipa gipin jatrangko permanent dokkan dakna on•jawa aro trading licence-koba tarina on•jawa. Una agreba dingtang dingtang jolna gamchatgipa aro jakkaltogipa niamrangko manderang jinma tom•anio chanchirime tik ka•e donangtokaha ine NGO dilgipa saksa Annuar D.Sangma koborna parakataha.
Uni gimin mikangchi gipin jatrang Jengjal jolrangko man•gopgipa songrango sikatang niamrangko ma•sigija bading chiwalna aro dokkan dakna re•bajachina mikkrakataniko on•angjolaha.