Tura, January 25, 2023: Dadenggre-ni TMC candidate Rupa M.Marak, James Sangma-ni galchipe donanggipa Kantananggre songni manderangko Butbar salo grongeaha.
Kantananggre songo transformer nosto ong•ani a•sel bilsi 10 mangna bijoli gri andalao janggi tangna nangengachim.
Rupa Marak songni manderangko gronge indita bilsirangna bijoli gri neng•nikaniko man•engani gimin agan golpogrikangaha.
“Skotong Minister Conrad Sangma-ni adatang James Sangma chang gittam joljol MLA ong•oba, ua chingni songona changsaba re•bae niea dongja. Chinga andalao janggi tangna nangani gimin bang•a nengnikaniko man•enga” ine songni saksa Rupa Marak-na aganataha.
Songni manderangni neng•nikaniko nike, “Anga bilongen duk ong•a. Songni manderang James Sangma-ni Power Minister ong•miting somoio changni chang transformer nosto ong•ani bidingo aganjanapaha. Indiba James Sangma knachaktelja. Ua transformer-ko taripilna tangka hajal 50,000-ko on•gen ine ku•rachakaha, indiba bilsi 5 re•angpilaha sokatchipja. Songni manderang James Sangma-ni nokchi re•angoba uko noko man•rongja. Uandakgipa obostarangko songni manderang chagrongenga, indiba ua maming ja•kuko de•jaha” ine Rupa Marak suk ong•gijaniko parakataha.
Kantananggre songni chadamberang skul aro kolej-rango poraitokenga. Uamang lem aro mombatirangko so•esa poraienga. Iani bidingo Rupa Marak Power Department-ni manderang baksa agangolpogrikenba ta•raken dakchakaniko on•china didiataha.
Kantananggre songni Sordar, James Sangma-ni kamko raken jegalataha, “Anga MLA James Sangma-ko chang brina bate grongaha, indiba anga uni aganchakaniko man•ja. Ua chingni songna tangka hajal 50,000-ko on•na ku•rachakaha, indiba on•chipja. Songni bi•sarang bijoli dongjani a•sel bang•a neng•nikaniko man•enga” ine duk ong•aniko parakataha.