Tura, Nov 8, 2022:West Garo Hills a•jani Dadenggre-o donggipa Community Health Centre (CHC)-na a•dokni Health Minister Pa James Pangsang K.Sangma, Monggolbar salo Ambulance gari ge•sako on•gilanagaha.
Indake ia ambulance-ko on•ani somoio Dadenggre C&RD Block-ni BDO Pa Cheman D.Shira, Dadenggre Civil Sub Division-ni SDO V.Agalwal, Dadenggre-ni Nokma Grenath Sangma, dokdor-rang aro dingtang dingtango gadango donge kamko ka•enggiparang manderang dongpae bakko ra•angaha.
Ia namgipa cholko on•anina Dadenggre jolo songdongenggipa manderang Pa James Sangma-ko gisik ka•tong gimikchi mittelangaha. Maina ru•uta bilsirangoni Dadenggre CHC-o ambulance gari dongjani a•sel sagipa manderangko salrurana gita neng•nikaniko man•engachim, indiba da•alo Pa James Sangma-ni ka•sae ambulance ge•sako on•anichi jolni manderangna re•a doanio namen dakchakani ong•gnok ine jolni manderang kusi ong•aniko parakataha.
James Sangma tom•anio jinmana aganprakengon, “Anga dingtangmancha Hans Foundation-ni Dadenggre CHC-na ka•sae Ambulance ge•sako on•atahani gimin kusi ong•a aro mittelna sika. Ia gariko on•anichi dingtangmancha jolni manderang nambata gadango sana bananiko dakna aro re•a doanio dakchakani ong•gen ine anga ka•songa. Unbaksana, anga da•al salni bako dokdor-rang, nurse-rang, Civil SDO aro gipin Official-rang baksa Dadenggre CHC-ko nirok sansianiko dakaha aro songdongenggipa manderangna nama sana bananiko on•china mongsongbate dokdor-rangko disina sika. Jedakode mikkangchi Dadenggre CHC-o nama sana bananiko manderangna on•na man•gen aro namroro silroroaniko nikna man•gen. Anga da•alo namen kusi ong•a, mikkangchi an•ching apsan ku•monge Dadenggre jolko nambatatna, ja•ku de•anggen ine anga bebe ra•a” ine Pa Sangma aganangaha.