Tura, April 20, 2023: Garo Students’ Union (GSU) Western Zone (North) Dadenggre, West Garo Hills a•jani Deputy Commissioner-na Dadenggre Civil Sub-Division-ni SDO gita lekka sedoate, bijoli tik ong•jani bidingo janapataha.
“Bijoli tik ong•jaengani a•sel Dadenggre jolni wilwilao dongenggipa manderang namen neng•nikaniko man•enga. Bijoli pringo kimitgenchimode, attamosa ching•atpilenga, indake attamo aro walo bijoli kimitahaode, salgipin pringosa ching•bapilenga. Ian songni manderangna bang•a neng•nikaniko ra•baa. Una agreba poraienggipa chatro chatrirang aro Office-o kam ka•enggipa manderang bijoli tik ong•jae, bang•a neng•nikaniko chagrongna nangenga. Bijoli dongjae, andalmindik ong•ani somoio cha•ugiparang aro ra•seke ra•giparangna namgipa cholko on•na aro uandake andalmitting somoiosa cha•ugipa aro ra•seke ra•giparangna namgipa chol ong•a. Indakgipa obostarangko Dadenggre jolo nikna gita man•ronga. Uni gimin, Dadenggre Sub-Division, Meghalaya Power Distributor Corporation Limited, 33 ba 11 KV Power Sub-Station-o kam ka•enggipa manderangna changni chang mol•molahachim, indiba knachakjaha” ine GSU Western Zone-ni President, Tengsan M Marak janapataha.
Uandake songo noko ong•enggipa obostarangko nike, GSU Western Zone, Dadenggre ia obostani bidingo ta•rake ja•ku de•angchina bil gnanggipa Officer-ko mol•molataha.