Tura, March 13, 2023: Garoland State Movement Committee (GSMC) HQ Tura, Simsanggre-o tom•aniko ong•ate, GSMC Eastern Zone-ko songaha ine GSMC HQ Tura-ni Additional GS Bostone M.Sangma koborna u•iataha.
Indake ia tom•anio GSMC-ni Co-Chairman Balkarin Ch. Marak mongsonggipa ong•e dilangaha aro bakko ra•giparang pilakon rimchaksoan baksa Garoland-ko nangnikani bidingo agantalate on•angaha.
“1889 bilsionin A•chik jatna dingtang a•dokko nanga ine A•chik Matgrik Pa Sonaram R. Sangma dabichengdilaha aro da•alona kingkingba ja•ku de•aniko dakenga. Batanggipa bilsirango Covid sabisini a•sel Public Meeting-rangko ong•atna chol ong•jagenchimoba, 2022 bilsioni dipet dabianiko dakna a•bachengtaiaha” ine Balkarin Ch Marak aganaha.
“Mikkangchi an•chingni deritchu su•ritchurangna A•chik jatni dakbewal rikbewalrangko skie ra•na aro tange rakkina gita dingtang a•dokko dabienga. Uni gimin chingni dabianiko man•kuja dipetna, chinga dontongjawa aro rakbata ja•kurangko de•e kamrangko ka•anggen” ineba Balkarin Marak aganaha.
GSMC-ni Chief Adviser Purno K Sangma ia tom•anio dongpae jinmana aganprakengon, “An•chingni A•chik Pagitcham Pa Sonaram R Sangma, A•chik jatna dingtang a•dokko nanga ine skang chengonin dabidilangaha. Indake uni siani bilsi 100 batako da•ona kingkingba Bakrapur songo gisik ra•e manienga. Gitcham dilgiparang Mody K Marak aro Emonsing M. Sangma 1946 bilsio British dilgiparangna lekka sedoate, A•chik jatna dingtang a•dokko dabigenchimoba, Britist sorkari knachakjaha. Unbaksana bang•a NGO-rang jekai GSU, GNC aro ANVC dolrang dabiangaha. A•chikrangna Garoland a•dokko man•genchimode, A•chik jat bang•a namgnirangko man•genchim. Indiba A•chik jat da•ona kingkingba dingtang a•dokko man•kujaenga. Gipin a•dokrangko niatgenchimode, Mizo aro Naga jatrang an•tangtangni a•dok donga. Uni gimin A•chik jatni namgnina dabianiko dakengon, an•ching sakantian ku•cholsan nangrime kamrangko ka•achisa chu•sokna gita man•gen” ine aganangaha.
GSMC HQ-ni sakgipin Co-Chairman, Jakrak A Sangma tom•anio jinmana aganprakengon, “A•chik jatko tang•doatna an•ching Garoland a•dokko nangchongmota. An•chingni agangipa ku•sikko niatgenchimode, an•ching jattangni ku•sikkosa agana. Uandake Bihari ku•sikko agangipa jat Bihar a•dok donga. Punjabi ku•sikko agangipa jatrang Punjab a•dok donga. An•chingni A•chik a•song gimikni gitan ja•manchakaniko man•enga. An•ching Garo Hills a•jao Governor House, Assembly Building, Chief Minister Office, Secretariat Building aro High Court da•onaba dongkuja. Uni gimin, an•ching pilak obostarangko nigrike ku•cholsan meli nangrime, A•chik jat aro a•songna namgniko ra•bana kamko ka•na” ine Jakrak Sangma sakantiko ku•mongaha.