Tura, April 10, 2023: Garoland State Movement Committee (GSMC)-ni Garoland State-na dabie dal•begipa tom•bimonganiko re•baenggipa April 15 tarik, pring 11:30 bajio East Garo Hills a•jani Skotong songjinma Simsanggre-o ong•atenga ine parakataha.
Uni gimin pilak A•chik a•songni manderang, songko nokko dilgiparang, toromko dilgiparang, Nokma, Sordar-rang, NGO-ni dilgiparang, dingtang dingtang gadango kam ka•enggipa sakantikon ia tom•bimonganio, Garoland-na minge bak ra•epachina mol•molataha.
Ia Garoland State pilak A•chik jatnin ong•a. “Beben chinga GSMC-ni bimingko donne dabiengon, A•chik a•songo songdongenggipa sakantini bil jak aro ku•rang on•paani ong•a. Chinga na•simangni dedrang ong•e, haturi ba hammer gitasa ong•aia, na•simangsa chingko skie ba aganne, A•chik a•song gimikni palo dakdilna bilko on•pabo” ine GSMC HQ, Tura-ni Co-Chairman Te Balkarin Ch.Marak mol•molataha.
A•chik a•songna dingtangmancha, Nokgipa Isol Nitogipa a•songko pattiaha.Ia pattigimin a•songko nirok simsakna aro nitimna gita an•ching sakantini jako ong•a. Uni gimin hai A•chik a•songko nirok simsakna aro gipin jatni onchepaoni jakgitele janggi tangna ineba Balkarin Marak ku•mongangaha.
“Chinga Garoland-na dabianiko mikkangchiba dontongjawa. Saobarang chanchisretani ba mittakani ong•enggenchimoba, ian da•oni dabienga ong•ja, skango Pa Sonaram R Sangma sagini chasongonin dabibaenga. Apsandake, an•chingni gitcham dilgipa P.A.Sangma sagiba, Garoland State-na Parliament-o ku•rang on•angaha. ‘Chinga chonchongipa Tribal-rang jekai Gurkhaland, Bodoland, Karbi,Tripraland-na State-ko on•pabo’ ine ku•rang on•angaha. ‘Angni Tribe Garoland ong•a’ ineba aganangaha. Chinga P.A Sangma-ni agangipa kattarangko gualna man•ja, pangnan gisik ra•a. Uni Parliament-o agangipa kattako chinga mande ra•a. GSMC maidake gualna man•gen, uni ku•rang on•gipa kattako da•ona kingking video-rango nike gisik ra•ata. Ua da•o dongkuode, Garoland State-na ku•rang on•aniko niktaigenchim” ine GSMC dilgipa parakataha.
Uni gimin, ka•sara A•chik a•songni manderang Simsanggre-o ong•atenggipa GSMC-ni tom•bimongaona re•bae bak ra•etokpachina sakantikon mol•moldapataha.