28 Jan 2022, Tura: A•chik Youth Welfare Organisation (AYWO)-ni gitcham General Secretary, Lyiend Roshan R.Marak A•chik a•songo songdongenggipa sakantina ia bilsi gitalni nama sikaniko on•atchengaha.
Lyiend Roshan Marak-ni parakatani gitade, badiaba songbad-rango job reservation-ni gimin seatanirangko niksoani gimin janapatengon, Meghalaya A•dokko man•chengaoni je niamko Meghalaya a•doko songdonggipa manderang dake rike, kam ka•e cha•china sorkari niamko tarie on•ahachim, uan Job Reservation Policy ong•a aro 40%-ko A•chik-rangna 40%-ko Khasi aro Jaintia-rangna on•manaha. Indiba ia niamko tarianiara jatko tang•doangna aro songdong a•chaenggipa manderangna janggi tangna on•gimin niamko nipiltaina agananiara maiba gisiko neng•nikani dongna nanga ine ua janapataha.
Ia on•gimin niamkoara jatni jelaniko nigrikesa on•manaha. Indake on•gimin niamko skia poraia dal•dalgipa manderang ong•eba, indake dakaniara gisik apchonne chanchiani ong•a uni gimin, ‘anga ia on•gimin niamko nipiltaina dakdilenggipa dolrangko indake dakjachina mol•molaniko on•atenga. A•chik jatde chingna 40% on•giminiko tang•dodapatna Meghalaya sorkariko mol•molatenga, maina A•chik jat namen jelaha aro skia poraia matchote kam man•gija dongengani gimin, haida Reservation-ko A•chik-rangna 50% tang•dodapatode sorkariko A•chik A•song mitelbegenchim’.
Ia Reservation-ko A•chik A•songna nanganide dingtang dingtang karkana ba skigipani kamrangko ka•na gitaba Garo Hills-o skichakram skulrang bang•brekuja, sorkari nokdringko taoatode Khasi Hills-na bate Garo Hills namen komia. Uni gimin bang•a sorkarini skotong kam ka•chakramrangoniko uni jachon ka•chakramko Garo Hills-o donenba janggi tanganiko A•chik jatna on•na man•ode nambatgipa ong•gen ine Roshan Marak janapataha.