Baghmara, June 22, 2022: A•doko jimbee mikka waani a•selo gipin a•jarangna bate South Garo Hills a•jaan nosto ong•batako man•aha ine nikna gita man•aha.
A•arang rudapani, chi bannani a•sel bang•a manderangni janggirang gimaaha aro sak hajalni hajal manderang nokgri jamgri ong•aha ine nikna gita man•aha.
South Garo Hills a•jani Skotong songjinma Baghmara-ona re•gipa bang•a dingtang dingtang rama jal•langrang nosto ong•aha. Kobor man•soani gitade, South Garo Hills a•jani bang•a dingtang dingtang songrang jekai Siju, Emangre, Jadi, Nongalbibra, Karukol, Rewak, Balkal, Rongara, Maheskola, Khalu, Kanai, Bonbera, Rongru Asim, Mindikgre, Nengkong aro gipin songrang Baghmara re•bana gita rama dongjaha. Batanggimin sal 4-na skang National Highway (NH)-62 ramao a•arang rudapani a•sel re•a doanirangko champengataha aro sak hajal 40 manderang neng•nikaniko man•aha ine parakataha.
India, Bangladesh a•songni sima ari jolrango ga•akgipa, South Garo Hills a•jani songrang batanggimin salrango bang•a a•arang ruani aro chi bannanirangko chagrongaha. Indake a•arang rudapani a•sel a•dokni sak 8 manderang janggitangko gimaataha, jeon saksade bilsi 4 ong•gipa me•a bi•sa ong•achim aro Rongsa A•we songni sakgni manderangko sandia man•kujaenga ineba parakataha.
Komibeoba dam 6 songni dollongrangko ta•rakgipa chi man•pakangaha.Uandake bijoli aro Mobile tower-rang nosto ong•ani a•sel, a•jani bang•a biaprangon kobor ra•grikna gita man•jaha.
Indake ong•engon, Indian Air Force-ni dakchakaniko man•ne Moheshkola songni manderangna sildoreng gita nanggipa bosturangko sokate on•na kamko ka•enga ineba koborko man•aha.
South Garo Hills a•jao ong•anggipa obostarangni bidingo MLA-rang, district administration aro gipin Official-rang baksa Monggobar salo chanchirimaniko dakangaha.
“Obostarangko namatna aro duko ga•akenggipa nokdangni manderangna ka•dimeaniko on•na gita raken kamko ka•enga. Anga sianggipa nokdangni manderangko gronganggen” ine Conrad Sangma parakataha.
Indake, Skotong Minister Conrad Sangma, Karukol-oni Siju-ona Simsang Chibima gita ringo gadoange km 6 mangko ja•achi re•ange duko ga•akenggipa nokdangni manderangko grongeaha.
Re•baenggipa sal 2 ba sal 3-ni gisepon NH-62 rama gita chongipa garirang re•taipilna man•gnok aro sal 20 ba 25-ni ja•mande dal•gipa garirang re•gurana man•gen ine Department-ni Officer-rang u•iataha.