Tura, Mar 14, 2023: Rongram bajaro mingsa jagokmanpilgipa a•sel ong•aha. Dr Jimmy Carter Sangma, saksa gitcham GNLA bobil dol baksa jak donggipa, Monggolbar salo Rongram dollong sambao be•en palgipa manderangoniko tangka gilna re•ange, kenbegnigipa a•selko chagrongaha.
Koborni gitade, Monggolbar walni 7 bajimango Dr Jimmy aro uni dol be•en palgipa manderangona re•ange, tangka dabiaha. Indiba be•en palgiparang tangka on•na jechakahani gimin Dr Jimmy manderangko den•na am•e ka•mikkenataha.
Indiba manderang Dr Jimmy aro uni sak 3 ripengrangna bame on•jaha. Indaken bang•a manderang, Dr Jimmy aro uni dol baksa kajia ong•na a•bachengaha. Indake jegrikani ja•man bang•a manderang Dr Jimmy aro uni ripengrangko jinma dokgrimahani gimin, kajia ong•gipa biaponi kate chakaha.
Indake manderangni ka•onangako namatna man•jaha. Manderang Dr Jimmy-ni mikkango donggipa mahindra bolero pick up gariko ka•onange nosto ka•aha aro manderang jinma gariko Ganol chibimaona sikrurue galataha.
Ua somoio pulisrang sokbae, ka•o nangenggipa manderangni jakoniko Dr Jimmy-ko jokataha aro uko pulis custody-ona rimangaha. Indake Dr Jimmy-ko pulisrang rim•e, medical examination-na ra•angaha ine u•iataha.
Ia a•sel ong•aniko kobor man•soe bang•a manderang tangka dabigiparangni kosako raka sastiko on•china didiangtokaha.
Ia a•selni bidingo Akgrimran Marak aro Silman Sangma, tangka dabidrae kajia golmal ong•atna jotton ka•gipa Dr Jimmy aro uni ripengrangko niam gita badi ka•aha ineba u•iataha.
Badi ka•ani a•selde, March 14 tarikni attam 3 bajimango Chibra Agal-ni mande saksa Niana minggipa re•bae, soroksamo me•su palenggipa Rupali D.Sangma-oniko “Angko Dr Jimmy Carter Sangma tangka gilna watata” ine dagrange tangka gileaha.
Indakmitting somoio Rupali Sangma-ni manderang rang•san re•bae, mai ong•a, sing•sandianiko dake Dr Jimmy-ko ka•onange aganengachim. Uni ja•mano jegrik dokgrikaona sokaha. Unon rang•san Dr Jimmy do•o den•gipa atteko ra•e, manderangko chadrapna a•bachengaha aro jegrikgipa a•damon, Alagre-ni Akgrimran Marak aro Silman Sangma saknaako man•aha ine koborna parakaha.
Ia a•selni bidingo case No.25 (03) 2023, IPC-o pangchake, sections 384 (extortion), 324 (voluntary causing hurt by dangerous weapon), 307 (attempt to murder) aro 34 (acts done by several persons in furtherance of common intention)-ni ning•o Dr Jimmy-ni kosako Tura Pulis Station-o mamlako segataha. Indake iani bidingo pulisrang sing•sandianiko dakenga ine u•iataha.