Baghmara, March 21, 2023: South Garo Hills a•jani District Disaster Management Authority (DDMA), mikkarang waengani gimin mikkrakataniko on•ataha.
Indian Meteorological Department (IMD)-ni u•iatani gitade, a•jao mikka jimbee wagen ine parakatahani gimin DDMA, South Garo Hills a•jani ning•o donggipa pilak ning•tubgipa songrangchi biap nina aro camping-rangko ka•angpajachina mol•molataha.
“Wari Chora re•angna miksongenggipa manderang, mikka waanirangko niroke aro weather forecast-ko nigrike re•angchina aro trekking-na re•engon, ding•atgipa ba•rarang, satta, raincoat, chi nanggijagipa trekking juta ba waterproof trekking shoes aro gol•dik ba walking stick-rangko jakkalna nanga” ine u•iataha.
Tanggitik a•selrangko chagrongna nanggenchimode, DDMA-ni on•atenggipa nombor-rangona call ka•e u•iatna gita man•gen. DDMA Baghmara Office-ni number 7005497930, Pulis Control Room-ni number 9612612805 aro 7005457449, Baghmara C&RD Block-ni number 7005197185, Rongara Block-ni number 6009837785, Gasuapara Block-ni number 7005377927, Chokpot Block-ni number 8787554142-ona call ka•e u•iatna man•gen ineba u•iataha.