Baghmara, Mar 14, 2023: South Garo Hills a•jani Chokpot Civil Sub Division-ni ning•o donggipa, Dareng chibima Chokpot jolo dilsa mongsonggipa chibima ong•a. Ua Chibima Nokrek a•brioni jokbae Chokpot jol gita Bangladesh-ona jokanga.
Ia chibimao dal•dalgipa Warirang aro na•tok na•batrang bang•en gnang ine u•iataha.
Indiba ia Dareng Chibima sambaoniko niam gri ro•ong bikotna 2021 bilsioni a•bachengaha. Indake ro•ong bikotgipa biapara Chokpot Budugre A•kingoni ong•achim. Indake niam gri ro•ong bikotani gimin Chokpot jolo songdongenggipa manderang suk ong•janiko parakate, jinma jegalaniko dakaha.
Uni gimin Chokpot jolo songdongenggipa manderang ro•ong bikotaniko dontongatna gita Chokpot Area Vigilance Committee (CAVC)-ni dilachi re•anggipa 2021 bilsio dontongataha.
Uni gisepon, ia 2023 bilsini February jao ro•ong bikotna a•bachengtaiaha, uko dontongatna gita CAVC, Chokpot-ni SDO aro SDPO-na badi ka•e lekka sedoataha, indiba manigija ro•ong bikotdraani gimin gittamgipa changna Chokpot jolo songdonggipa manderang jegale Monggolbar salo jinma re•jomaniko dakaha.
Indake ong•engon, Chokpot Civil Sub Division-ni Officer-rang niam gri ro•ong bikotaniko dontongatna raken kamrangko ka•anggen ine parakataha.
Ia Dareng Chibima jolo song dam 30 ba 40 songni manderang au-miksuna aro pilak nanga kamrangna jakkalengachim.
Unbaksana ia chibimao nina nitogipa warirang bang•en gnang, indiba ro•ong bikotani a•sel, a•arang chibimaona jokange dal•dalgipa warirangko daptokaha. Ua chibimao donggipa bang•a na•tok na•batrangni dongramko nosto ka•an baksa Chokpot jolo songdongenggipa manderangna namen neng•nikani ong•chongmotenga. Uni gimin ro•ong bikotaniko dontongchina dabie jinma jegalaniko dakangaha.
Budugre A•king Nokmani talatani gitade, ua biaponiko ro•ong bikotna, “Ango maming bi•a am•a gri, bi•sarangna birth certificate tarina ine tol•enba, Nokma document-ko am•aha, ua lekkao anga mamingkoba seata dongja, soi ka•e mang mangsa on•ataia” ine parakataha.
Indake niamni a•palo kam ka•aniara songna nokna nama ong•ja aro chinga ia biaponiko ro•ong bikotna on•jawa ine Budugre songni manderang, Nokma Chrarang aro Chokpot Area Vigilance Committee (CAVC)-ni Chairman Jeshwell Ch Marak koborna u•iataha.