Tura, April 10, 2023:Tura Dakopgre-o donggipa 120 Battalion Central Reserve Pulis Force (CRPF), “Valour Day” Cultural Night-ko Robibar attamni 6:30 bajio District Auditorium, Tura-o maniangaha.
Ia Valour Day-ko maniani miksongara, 1965 bilsini April 9 tariko Pakistan sipairang Gujarat-o donggipa CRPF Sardar Post-ko chadrapmitting somoio CRPF sipairang ka•dongbee warachaksoanichi, Pakistan sipairangko amataha. Indiba adita sak CRPF sipairang dakgrikmitting somoio janggitangko gimaataha, ua salko gisik ra•na gita April 9 tariko bilsianti CRPF, ‘Valour Day’-ko manienga. Ua somoio Indian CRPF sipairang maikai Pakistan sipairangko dakgrike amatahachim mesokangjolaha.
Indake ia manio, West Garo Hills a•jani gital DC Jagdish Chelani, Ampati-ni SP, Tura-ni BSF aro CRPF Commandent-rang, CRPF aro Pulis Officer-rang, CRPF sipairang nokdangtangtangni manderangko rimbae bakko ra•angatokaha.
Unbaksana ia program-o Assam-ni git ring•na changgipa aro Indian Idol-o bak ra•gipa Jituban Bora aro uni ripeng re•bae, git ring•e manderangko an•saoatangaha. Uasan ong•aigija Tura-o songdongenghipa dingtang dingtang jatrang a•tangtang jatni dakbewalrangko dakmesokangengon, A•chik Wangalgipa dolba bak ra•angpaaha.