Williamnagar, April 3, 2022: East Garo Hills a•jao donggipa New Chidekgre songni rama rikgamo dokkan dake cha•enggipa me•chikma saksako, NH 44-ni bijangchio CRPF saksa drae til•ekna jotton ka•ani gimin dolgni NGO-rang jekai NAS aro AHAM sing•sandianiko dakahaon, kakket ong•a ine ma•sina man•aha.
Koborko man•soani gitade, National Highway (NH)-44-ni bijangchio nirokaniko dakenggipa CRPF sipai Birender, April 2 tarikni pringo Chidekgre songona km 1 mang ong•gipa ramako re•ange dokkano me•chik saksan kam ka•e dongenganiko nike uko drae til•ekna jotton ka•aha ine duko ga•akgipa me•chik aro nokdangni manderang NAS aro AHAM na u•iataha.
“Chinga koborko man•soani bakan re•ange ia obostani bidingo me•chikko gronge sing•sandianiko dakeaha. Ua me•chikni agana gitade, CRPF Birender an•tangni silaiko re•angenba dokkano me•chikni saksan kam ka•e dongengako nike uko drae til•ekdrana jotton ka•aha, indiba ua ka•donge aro rasong gnangbee an•tangko til•ekdraoni naljokatna man•aha.Chinga CRPF-ni Incharge-ona re•ange grongenba ia obostani bidingo aganeaha aro dos dakgipa CRPF-ko kraa gita bichal ka•china didiangaha. CRPF-ko sorkari a•songko namgijaoni warachaknasa gitasa rakkia indiba saksanni namgijagipa kamni a•sel pilakan krachana nangaha. Chinga CRPF, Birender-ni kragijagipa kamko raken jegala” ine NAS aro AHAM u•iataha.