Baghmara, Feb 8, 2023: NPP-ni national President aro Skotong Minister Conrad K.Sangma Baghmara-ni NPP candidate Satto R.Marak-na campaign ka•angaha.
South Garo Hills a•jao donggipa Baghmara elakkao susaenggipa NPP candidate, Satto R Marak-na a•dokni Skotong Minister Conrad K Sangma, Sombar attamoni a•bachenge salgnina Baghmara-o campaign ka•angaha.
Baghmara elakkani ning•o donggipa Sibbari-oni a•bachenge,
Malikona, Demplipara aro Lower Gasuapara jolrango, NPP-ni candidate-na campaign ka•angaha. Ia songrango aro dingtang dingtang gittimrango songdongenggipa manderangna a•dokni Skotong Minister aganprakangengon, 2018 bilsina skangde pilak sorkarian South Garo Hills a•jako nichanggalani a•sel maming namroro silroroaniko man•jaha, indiba 2018 bilsio NPP-ni
dilachi gital sorkariko rika intalan dingtang dingtang minister-rang, South Garo Hills a•jaona wenbarongaha aro bang•en namdapatani kamrangko ka•na a•bachengaha.
Indake ia 2023 bilsioba NPP candidate-rangko seoktaigenchimode, South Garo Hills a•jako namdapatangkuna NPP dilgiparang rakbate kamrangko ka•anggen ineba Pa Sangma ku•rachakangaha.