Tura, April 28, 2023: Meghalaya a·dokni Skotong Minister Pa Conrad K Sangma aro Meghalaya Legislative Assembly-ni Speaker Pa Thomas A Sangma-na Bristibar salo, NPP, West Garo Hills Unit-ni gita mande ra·pilskaani program-ko Tura-ni District Auditorium-o ong·atangaha.
Ia program-o Skotong Minister, jinmana aganprakengon, gnigipa changna uko MLA seokahani gimin, Tura-ni manderangko mittelpilangskaha. NPP-chi dilenggipa sorkari, a·doko namroro silroroaniko ra·bana rake kam ka·enga ine parakangaha.
Ia 2023 bilsini Assembly eleksin-o a·dokni manderang NPP-ko seokahani gimin namen dingtangmanchagipa eleksin ong·aha ineba ua aganangaha.
Skotong Minister-ni aganangani gitade, Garo Hills-o dam 24 elakkarangoni dam 18 seat-rangko NPP cheaha aro a•dokna NPP-san namroro silroroaniko ra·bana man·gipa dol ong·aia ine manderangni ka•dongna man•aniko mesokaha.
Unbaksana ia tom·anio Assembly-ni Speaker Thomas A Sangma-ba jinmana aganprakengon, ia bilsini eleksin-o uko seoktaiahani gimin, North Tura elakkani manderangko mittelpilangaha. Ua Assembly-ni Speaker ong·e dilna gita cholko on·ahani gimin ua Skotong Minister Conrad K Sangma-ko mittele aganangaha.
Ua PA Sangma sagini ning·o donge kam ka·ani salrangko gisik ra·atpilenba, ua Assembly-ni Speaker ong·e, Assembly-ni mikkimko ra·doanggen ine aganangaha.
Indake ia program-ko ong·atanio manderangko an•saoatna aro kusi ong•batatna dingtang dingtang dakmesokanirangko ong•atangjolaha.