Baghmara, July 5, 2022: Re•anggipa June 29 tariko Chokpot jolni NGO-rang apsan ku•monge tom•aniko ong•atangaha ine koborna u•iataha.
NGO-rangni tom•e chanchirimanio Chokpot jolo songdongenggipa manderangni namgnina rakbate kamrangko ka•angna manchiangaha. Chokpot jolo mongsongbatgipa neng•nikaniara re•a doani rama jal•langan ong•achim. Adita jarangna skang, a•dokni Skotong Minister Conrad Sangma, Chokpot ramako tarina tangka gong kror 45-ko chamataha ine ku•rachakanggipa da•onaba maming kamko ka•a dongkuja ine NGO-rang parakataha.
Chokpot ramako tarina tangka chamatmanaha ong•ode, indita bilsirangna galchipe donenggipa kamko ta•rake a•bachengatchina NGO-rang Skotong Minister-ko mol•molataha.
Minggipin, Chokpot Civil Sub Division-ni Officer-rangna quarter rikmanaha, uni gimin officer-rang quarter-tangtango donge kamtangtangko ka•angchina gitaba didiangaha. Unbaksana Chokpot Community Kolege, buildingko ta•rake rikchina gitaba dabiangaha.
Mikkangchi rakbate kamrangko ka•angna gita Chokpot jolni NGO-rang apsan bakrime bimang ge•sano ja•ku de•angna, ge•sa Joint Action Committee (JAC) bikotaha ba songe dilgiparangko seokangjolaha ine JAC-ni Publicity Secretary Chingkam Ch.Sangma u•iataha.
JAC-ni gital dilgiparanga Chingka R.Marak President, Esaya Ch.Marak Vice-President, Sengbat Sangma Secretary, Malseng Marak Joint Secretary, Charming Sangma Chief Organizing Secretary, Leningston Sangma Organizing Secretary, Chingkam Ch.Sangma Publicity Secretary aro Heringstone R.Marak Advisor.
Ia seokgimin dilgiparang mikkangchi Chokpot jolo songdongenggipa manderangna rakbate ja•kurangko ga•e kamrangko ka•anggen ku•rachakangtokaha.