Baghmara, Mar 14, 2023: Chokpot elakkani ning•o donggipa Balwatgre songo, Dildora English Skul-ko March 13 tariko Novembirth Ch.Marak oprake on•aha.
Novembirth Ch.Marak re•anggipa Assembly election-o BJP candidate ong•e, Chokpot elakkao susae chena man•jaoba, jeko ua election-na campaign ka•mitting somoio songni manerangna ku•rachakahachim uko chu•sokate on•aha.
Novembirth Marak-ni janapatani gitade, Chokpot jolo chu•onga gita English skulrang dongjani gimin Dildora English Skul ge•gittamko kulie on•na miksongenga. Indake skanggipa Balwatgre songo Dildora English skulko kulie, Sombar salo oprake on•aha. Una agreba gipin songrango ge•gni Dildora English skulko kulie on•angkuna miksongenga ine parakataha.
Apsan dake, Novembirth Marak Asanang Rengsangre songoba Dildora English Skulko 2020 bilsini February 20 tariko kulie on•aha.
Ua re•anggipa election-o chena man•jaoba, songni manderangna ka•sae, Dildora English Skul ge•gittamko kulie on•na miksongenga aro an•tangni miksongako chu•sokate on•na raken kamrangko ka•enga. Jedakode songni bi•sarangna namgipa chol ong•gen, ia miksonganio songni nokni namgnina skulrangko kulie on•anggen ineba parakataha.