Baghmara, Mar 26, 2023:Bangladesh aro India a•songni sima ari jolrango chel•chakgipa sipai kotokrang ba 170-BSF Battalion Sonibar salo Bangladesh a•songni sima ari jolrango donggipa South Garo Hills a•jani Sima ari sepangjolni manderang baksa meli-nangrime mikkangchi kamrangko ka•angna miksonge Mahadeo songo Medical Camp aro Civic Action Program (CAP)-ko ong·atangaha.
Ia Civic Action Program-o Kanai, Maheshkola, Ganganagar, Bagli, Nikora, Patlaban, Karaibari aro Mahadeo songni manderang sak 200-na baten bakko ra·tokangaha.
Ia program-o 170 BSF Battalion-ni Deputy Commandant AS Khan aro Assistant Commandant Nimish-ba bak ra·angaha.
Unbaksana songni Nokmarang, skulni headmaster-rang, skigiparang aro skulni chatro-chatrirang bang·en Civic Action Program aro Medical Camp-o bak ra·angaha.
Indake Civic Action Program-o skulni bosturang jekai lekka ki•taprang, plastic-ni chokkirang, kal•susaani bosturang, nokkingni tinrang, plastic-ni Syntex-rang aro indin sagiparangko porikka ra•e samrangko suale on·angaha.
Uandake BSF battalion-ni ong•atgipa program-ona re·bagipa manderang, BSF sipairangni namgipa kamna kusi ong•e de·mittelangaha.