Tura, Feb 8, 2023: Re·baenggipa February 27 tariko ong·atenggipa Assembly election-o susana South West Garo Hills a·jao sakgittam BJP candidate-rang an•tangtangni nomination-ko file ka•angtokaha.
Salmanpara elakkao Boston Ch. Marak,
Ampati-o Premananda Koch aro Mahendraganj-o Tingku N.Marak, apsan Ampati DC office-o nomination file ka•angaha.
Uamangni nomination file ka•ani salo uamangna chakgipa hajalni hajal manderang DC office-ona re•angpaaha.
South West Garo Hills a•jani sakgittam BJP candidate-rang nomination file ka•ani ja•man kobor ra•timgiparangna aganengon, Salmanpara elakkani BJP Candidate Boston Ch.Marak,
“Bang•a Centre-ni scheme-rangko gipin political dolrang, kangal cholgri manderangna sokate on•jaha. Bilsi 5-ni gisepo a•ddokni manderang cha•bokako man•aha. Indiba ia chango manderang dingtangaha aro namroro silroroaniko nangengaha.
A•songni Prime Minister Narendra Modi-ni re•dilanichi Meghalaya a•doko bang•a Development-rangko ra•bana man•enga. Meghalaya a•dok namen nitobegipa ong•a. Re•anggipa
2018 bilsio BJP-ni kosako matchu cha•na man•ja aro Kriatian-rangko onchepa ine matnanganiko dakahachim, ine sing•anina aganchakengon, gipin Political dolrang BJP-ni kosako tol•e matnangna cholko man•jaesa iandakgipa kattarangko agan-mittake roenga.
Indake ong•genchimoba, da•ode manderang ma•siaha. BJP party jat, torom basegipa ong•ja. Da•alo a•songni President-ba Tribal jatan ong•a, apsandake da•alo angni nomination file ka•ani somoio bang•a Kristian, Hindu, Muslim apsan bakrime, re•batokaha ine Boston Marak aganaha.
Apsandake, Mahendraganj-ni Candidate Tingku N Marak an•tangni elakkao chea ong•ode, ua dingtang dingtang namroro silroroaniko ra•bana aro kangal cholgri manderangko dakchakna rake kamrangko ka•anggen.
Uni aganani gitade, ia electiono chena ka•dongenga. Gipin dolrang, unbaksa susagengoba, una chakgiparang bang•bataha ine aganaha. Ia electiono BJP cholko on•skana manderang krenge kamko ka•enga. Uni gimin, jolni manderang BJP-na cholko on•skana ku•mongtokenga ine Tingku Marak aganaha.