Tura, February 15, 2023: Bharatiya Janata Party (BJP) darang toromkoba miknengja aro mikchepja ine MDC Bernard Marak parakataha.
“BJP-ni dilgiparang Corruption-ko bon•atna miksonga. Chinga darang toromkoba nosto ka•na aro bon•atna miksongja. Delhi-o donggipa BJP sorkarini dilgiparang darang jatkoba, kangal man•e cha•a, darang toromkoba miknengja. Chinga kangal cholgri pilaknan dakchakaniko sokatna gita bang•a scheme-rangko fund-rangko on•atenga. Chingni dilgiparang aro ka•rimskarang an•tangni miksongatangko chu•sokatna krenge kamko ka•enga. Uni gisepon BJP dol, kristian toromko mikbue namnikja ine agananiara, election-na politics kal•e, tol•gipasa ong•aia” ine Bernard Marak agan talataha.
BJP dolko anti-kristian ba kristian toromko bon•atna miksongenga ine agananiara kakket ong•ja.Niatgenchimode, Nagaland a•doko BJP sorkari rikenga, indiba kristian toromo janggi tangenggipa manderangko darangkoba mikchepja aro uamangni manianio golmal ka•aba dongja. Nagaland a•doko BJP sorkari rikgenchimoba, a•dokni pilak kristianrang aro gipin toromni manderang maming neng•nikaniko man•ja. Uasan ong•aigija, ma•mong sorkarini Ministry of Minority Affairs bang•a dakchakanirangko sokatenga. Meghalaya a•dokoba BJP MDA sorkari baksa bakrime kamrangko ka•enga. Indake MDA sorkari baksa nangrime kamrangko ka•anichisa ma•mong sorkarini on•atenggipa scheme-rang aro fund-rangko man•enga. Ma•mong sorkarini on•atenggipa scheme-rangko a•doko darangba mikkang nitegija sualenga. Sorkarini sokatenggipa scheme-rangko sualengon, darangkoba jat aro toromko sing•chenge sualja. Meghalaya a•doko dongenggipa bang•bata manderang Kristian toromo janggi tangenggiparang ong•a. BJP sorkari toromko dingtangatna aro napdraatna miksongja. BJP gital sorkariko rikna cholko man•genchimode, Kristian toromko ripingna aro chel•chakna rakbate kamrangko ka•anggen ineba Bernard Marak agandapataha.