Tura, August 3, 2022: A•dokni BJP President Ernest Mawrie, Bernard Marak-ko tol•e dosio ga•akataha ine agangipa kattako Tura-ni Pulisrang raken jegalatskaha.
Pulisrang Bernard Marak-ni Baganko July jani 22 tariko chadrape sandirikitaha. Indake pulisrangni chadrape sansianio bang•a silchi-darerang, gopretgipa bosturangko man•aha aro ua bagano donggipa nokko ‘brothel’ ba me•chikrangko palram biap dake jakkalenga ine bang•a sakkirangko man•aha.
Ua building noko donenggipa sak bonga bi•sarangko Pulisrang jokataha ineba koborna parakataha.
West Garo Hills a•jani Superentindent of Pulis (SP) Vivekananda Singh Rathore-ni u•iatani gitade, Bernard Marak-ko sing•sandienga aro ia mamlani bidingo sandie man•gipa sakkirangko Court-na mesoke on•anggen ineba parakataha.
“Chinga maming dakeba Bernard Marak-ko tol•e dos galja, chingni raid ka•ani somoio bang•a Sorkari Officer-rang dongpaha. Uamang mikrontangchi ua biapo ong•enggipa obostako nikaha. Rimpu Bagan namen dal•begipa biap ong•a aro ua biapko Pulisrang tal•bate ma•sina sing•sandianiko dakenga” ineba SP parakataha.
Tura Pulis GHADC-ni dilgiparangna lekka sedoate, ua a•ani chongmot nokgipako sandichina didiataha. Unbaksana District Administration ia obostani bidingo Magisterial Inquiry-ko ka•china ge•etaha.
Pulisrangni ua baganko raid ka•ani somoio darang Media-ko rimchapangjaha, indiba ua biapo dongsoenggipa chadamberango mobile phone-rang dongani a•sel koborrangko ta•raken gipataha.
“Pulisrang attamni 6 bajio Rimpu Baganko raid ka•aha, indake waljatchio media ge•sani kobor ra•timgipa koborrangko man•soe raid ka•gipa biapona re•baaha. Gipin mediani manderang re•bagenchimoba, chinga uamangko nokchaksoaigenchim” ineba SP u•iataha.
Ia obostani bidingo koborrangko man•dapode uko Case Diary-o sengatenga aro Court-na u•iatroronga.
BJP dolni dilgipa Chuba Ao, Bernard Marak-ko tol•drae dos galdraenga ine matnangaha.
“A•jao gipin manderang apsan dakgipa resort-ko chalaienga, indiba maina Bernard Marak-kosan rim•na nanga” ine Chuba Ao sing•doangaha.
A•dokni BJP dilgipa Shanbor Shullai aro AL Hek-ba Bernard Marak-na chadenga aro una chakpaaniko mesokenga. Indiba Ma•mong sorkarini BJP dilgiparang maming aganchakaniko on•jaha ine SP u•iataha.