Assam, Aug 7, 2022:Garo Students’ Union (GSU) Assam State Zone (ASZ) aro gipin NGO-rang baksa bakrime re•anggipa August 5 tariko Assam Meghalaya, Inter State Border issue-ni bidingo tom•e chanchirimaniko dakangaha.
GSU-ASZ-ni Vice President Sengman Arengh-ni u•iatani gitade, pilak Assam a•dokni NGO dilgiparang an•tangtangni miksongani aro chanchianiko apsan dondime da•o ong•enggipa sima ario ong•enggipa obostarangni bidingo name chanchie jatska jat ma•sisretgrikaniko ra•bajachina, Assam aro Meghalaya-ni Skotong Minister-rangko namedake tom•tomataniko ra•bapilchina GSU-ASZ aro pilak Assam a•dokni Garo NGO-rang mikkrakatan baksa mol•molataha.
Assam aro Meghalaya a•dok ge•gnini sima arirango meligrikgijanirangko namatna agan chanchirimaniko dake tom•tomaniko ra•bana nanga aro Assam Merghalaya sima arini bidingo darangba politisize ka•pajachina Assam-ni Garo NGO-rang dabiangaha.
A•dok ge•gnini manderang meligrike dongna man•na gita jatni tom•tomaniko ra•bana nanga ine GSU ASZ, sakanti jatni ma•a paarang aro pilak jatni dilgiparangko mol•molataha. Pilak A•chik NGO dilgiparang tom•tomanina agan golpogrike sima ario ong•enggipa obostarangni bidingo a•dok sorkariko gronge memorandum-rangko on•ne dabianirangko dakenba tom•tomanikosa ra•bana nanga.
Unbaksana, so•sojengjeng ong•enggipa biapona re•ange, duko ga•akenggipa songni manderangko gronge ding•chaoatanide kraani ong•ja ine Assam a•dokni nangrimgimin Garo NGO-rang Assam Meghalaya Inter State Border issue-rangni bidingo jegalataha.