Shillong, November 19, 2022: A•chik NEHU Students Union (ANSU)-ni bilsi 25 gapaniko Shillong songjinmani Nehu Campus-o maniangaha.
Ia maniaona Rongrong elakkani MDC Te Rinaldo Koksi Sangma mongsonggipa sokgipa ong•e chadamberangna nama ku•pattianiko on•angaha. Unbaksana North Eastern Hill University Students Union (NEHU-SU)-ni gitcham Vice President Arnon D Arengh, ANSU-ni gitcham President Te Dhosrang Sangma, NEHU-SU-ni gitcham Advisor Rangajied Marwein-ba bakko ra•eaha.
“A•chik Nehu Students Union (ANSU) ian Shillong songjinmani North Eastern Hill University (NEHU)-o poraienggipa pilak A•chik chadamberangni nangani salo dakchakan baksana dangdike on•na 1997 bilsio bikotgipa A•chikrangni ge•sa dol ong•a. Ia dolko bikotchengani somoio A•chik Post Graduate Students Union (APGSU) ine mingachim. Indiba Under Graduate (UG)-o poraienggipa chatro chatrirangba Nehu-o dongani a•sel uamangko galchanggija jinma apsan ku•monge kamko ka•na miksonge 2017 bilsioni A•chik Nehu Students Union (ANSU) ine mingjingtskaaha. Indake ANSU-ni bilsi 25 gapaniko Nehu-o poraienggipa A•chik chadamberang Sonibar salo Nehu Campus-o maniangaha. Unbaksana Post Graduate (PG)-o poraienggipa gital chatro chatri rangnaba rimchaksoani program ba Freshers Meet-ko ong•atjolaha” ine ANSU-ni dilgipa koborna parakataha.