Shillong, August 22, 2022: All India Trinamool Congress (AITC) dolni Spokesperson, Saket Gokhale, a•dokni Dakchakgipa Skotong Minister, Preston Tynsong-na lekka sedoatenba, Shillong Smart City Ltd-ni bidingo uni guale agananirangko jegalataha.
Gokhali-ni janapatani gitade, “Companies Act, 2013-o Annual General Meeting matchotani sal 30 gisepon company-ni manderang, Financial Report-ko on•na nanga. Niamko ja•rikgenchimode, 2019, 2020, 2021 bilsirangni Smart Shillong City Ltd-ni Annual General Meeting March ba September jaon matchotna nangaha” ine u•iataha.
Batanggimin salrango, Preston Tynsong, “2019, 2020 aro 2021 bilsirangni financial report-rangko India a•songni Comptroller aro Auditor audit ka•e on•angaha” ine parakataha.
Ia kattarangko Saket Gokhale jegalatenba, “Batanggimin bilsi gittamni aro 2022 bilsini audit-ko ia bilsio apsan ka•a ong•ode, ian niamko pe•a gita ong•a. Shillong Smart City Ltd Company-ni manderang maina bilsi gittamni audit-ko on•jaha ine sing•genchimode, ua indakgipa aganchakanirangko on•ne jokgen ine chanchiama? Uamangna a•dok aro Union Sorkari kamrangko ka•china indita krorni kror tangkarangko chammaha” ineba janapataha.