Tura, November 19, 2022: Meghalaya Trinamool Congress (TMC) November 18 tariko Tura Law Kolej Field-o dal•begipa tom•bimonganiko ong•atangaha aro ia tom•bimonganio Garo Hills gimikni bang•bea manderang bakko ra•angtokaha.
Ia dal•begipa tom•bimonganio AITC-ni National General Secretary Abhishek Banerjee re•bae namen mikkim gnangataha.
Indake uni Garo Hills-ona re•baani gnigipa salo, ua Bishop Andrew R Marak-ko grongeaha. Uko grongani ja•mano ua, Tura Law Kolej Playground-ona re•ange jinmana aganprakangengon, maini gimin aro maio pangchake TMC-o napna nangengachim, agantalate on•angaha.
“Da•o re•baenggipa jagittamni gisepo an•ching Meghalaya-ni manderang darangkoba jat aro torom basegija pilakan apsan TMC dolna krimkro kamko ka•angna. National Puppets Party ba NPP, Meghalaya a•doko Meghalaya Democratic Alliance (MDA) sorkariko rikenga, indiba uamangni kam ka•anirangko niatgenchimode, uamang a•dokna maming kamkoba ka•jaenga. NPP dolni MDA sorkariko rikanichi Conrad Sangma-ni nokdangsan namgniko man•enga, Indake Conrad Sangma MDA sorkariko an•tangni man•gnina Meghalaya Democratic Alliance-ko My Democratic Alliance ine chanchie jakkalskaenga. Meghalaya a•dok namen nitobegipa aro rona rotogipa biap ong•genchimoba, ua a•dokna maming namgniko ra•bajaha. Ua songrango skulrangko kulie on•ani pal batesa chipengaha, ramarang re•na namgijagipa rama rangko nikbatna man•a. NPP sorkari da•ona kingkingba Eleksin Expenditure Report-ko mesokkujaenga. Chinga NPP sorkariko mikkang para jera ra•grikna ka•donge ra•bioba uamang pangnan jechakronga” ine Abhishek Banerjee aganangaha.
TMC dolni noksako talatangengin, “TMC dolni noksao donggipa ge•gittam bijakrang A•chik, Khasi aro Jaintia-ko miksonga.Mikkang 2023 bilsio an•ching Meghalaya a•dokna gital sorkariko ra•bana kamko ka•na. Chinga sorkariko rikna cholko man•ode, songni manderango sing•chengesa MoU-ko soi ka•gen aro A•chik, Khasi ku•sikko 8-gipa Schedule-o ra•gatchina ja•ku de•anggen” ineba aganangaha.
TMC-ni President Charles Pyngrope jinmana aganprakengon, “AITC dolni dilgiparang jinma apsan melie kam ka•anio bebe ra•a. Chinga dongdipgija Meghalaya a•dokna kamrangko ka•anggen. Chinga a•dokni namgnina kamko ka•engon, pilak manderangan chingna ka•saaniko aro chakpaaniko on•na nangnika” ine aganangaha.
Dr Mukul Sangma jinma baksa tom•anio bakrimengon, “Chinga Meghalaya a•doko songre songgabatani aro Bidani nok ong•atna sika. Indiba NPP dolni sorkari rikanichi Meghalaya a•dok, joa kal•ani aro cha•bokani noksa ong•skaha. A•dokni gimaatgimin gunko uamang ra•bapile on•na nanga aro cha•bokna nangja. Chinga TMC sorkari maming saloba jinmani nangnikgijako re•jawa aro pangnan jinmani namgnina kamko ka•gen ” ine aganangaha.
Ia tom•anio Meghalaya TMC State In-charge Dr. Manas Ranjan Bhutia, State President Charles Pyngrope, Songsak MLA aro TMC dolni dilgipa Dr Mukul Sangma, Umroi MLA George B Lyngdoh, Mahendraganj elakkani MLA Dikkanchi D Shira, Rangsakona elakkani MLA Zenith Sangma, aro gipin TMC dolni dilgiparang bakko ra•angaha.