Tura, Aug 25, 2022:Meghalaya a•dokni senior dilgipa aro gitcham minister Pa Adolf Lu Hitler (Lulu), gitcham State BJP Vice President Pa David Ch.Marak aro Education Department-ni gitcham Joint Director Pa Bupendro G. Momin Bristibar salo All India Trinamool Congress (AITC) dolo napeaha.
Uamang sakgittamni AITC dolo napeani somoio Rangsakona-ni MLA Pa Zenith Sangma, Chokpot-ni MLA Pa Lazarus M.Sangma, Dengnakpara-ni MDC Ma Sadhiarani Sangma aro gipin AITC dilgiparang party office-o dongpaha.
AITC dilgiparang uamang sakgittamko kusi ong•bee, AITC Office Tura-o rimchaksoaha. Uamangni AITC dolo napeanichi dolna katchabeani ong•a ine Pa Zenith Sangma aganaha.
“Angni da•alo AITC dolo napeani miksongade, MLA chakatna ong•ja, anga chaktjawa, indiba Meghalaya a•doko ong•enggipa obostarangko nike manderangko ma•siatna man•a dipet anga jotton ka•gen aro badia dolko baseode namgen, hai an•ching krimkro apsan ku•monge jatna aro a•songna kam ka•gipa dolko basena miksonge da•alo anga AITC-o napaha. Da•o ong•enggipa sorkari a•dok chigako pale cha•aniara jatna namen dukni katta ong•a, maina ua a•ako skangan District Council jako ra•aha, indake Nokma songna chanchimittingo dingtang dingtang a•selrangchi Nokma songna man•kujaon, da•o ua a•ako palate, da•o uamang dingtang dingtang kamrangko a•bachengatengjok. Beben Skotong Minister manderangna ua a•ako palaha ine aganjawa, ua statement-ko jedakeba on•aigen, indiba uni statement baditana kingking kakket ong•a, ong•gijako baseanide sakantini kam ong•a. Uni gimin namgipa leaderko baseanide manderango pangchakgen. Maina uani bidingo kam ka•na man•jawa, re•anggipa 1991-92 bilsirango mai ong•a, Garo Hills-ni a•ako Assam sorkari Koraibari ine biming mingdrae pillar-rangko songaha, indiba chinga ua pillar-rang gimikkon oke galaha. Indake jensalo chinga sorkariona re•baha, na•songni drae ra•anggipa a•ade chingnisa, chingna on•pilbo ine aganani gimin on•pilaha. Uni gimin apsandake kam ka•gipa dolko basena nanggen, uko sawa dakna man•gen, TMC-na agre darangba man•jawa. Meghalaya a•doko sawa namgni kamrangko ka•aha pilakan ma•sia Dr Mukul Sangma-sa ka•aha. Apsandake da•o ong•enggipa obostarangni gimin kam ka•gen ine chinga ka•donga, uni gimin uko baseanide manderango pangchakgen, manderang una bilko on•ode, ua kamko ka•gen” ine Pa Adolf Lu Hitler Marak aganaha.
“Da•alo an•ching quality leadership dongjani a•sel bang•bata department-rangon neng•nikanirangko man•enga, jekai SSA aro LP skulrang, health centre-rang, PHE, MeECL gimikon neng•nikani bang•pret, mai gimin indake ong•enga, namgipa leader-rang dongjani a•sel, namgipa leadership donggenchimode, maming saloba indakgipa obostarang ong•katja, name re•dilna man•a. Conrad Sangma chingna agana na•simang South Tura-o nanga kakketko see on•bo, anga (Conrad) officialrang baksa jinma apsan chanchie mingprakprako ka•gen, indiba ua kam mingsakoba ka•a dongja. South Tura elakkao namdapatna nangani bang•pret, indiba mingsa kamkoba nikkuja, ian angni mingsa Conrad Sangma-ni leadership ong•aniko namnikgijani ong•a. Uni giminsa anga da•alo namgipa leadershipko basee, mikkangchi nama re•mikkanganina an•tangni bil ama dipet jotton ka•e, TMC dolko bilakatna aro Meghalaya a•doko Dr Mukul Sangma-ni dilachi bilko jakkipe kamrangko ka•angna cholko on•taina miksonge TMC dolo napaha ine State BJP-ni gitcham Vice President David Ch.Marak aganaha.