A•chikrangni man•gni bak rensingko aro Tura Winter Capital-ko songchina dabianiko ra•piljawa:ACHIK 

Shillong, April 6, 2023:Meghalaya a·dokko man•chengaoni bilsi 50 batpiloba A·chikrangna chamgimin 40% kamrangko chu·onga gita man·jahani gimin kamrangko on·china dabianiko aro Tura-ko Winter Capital songchina dabianiko A·chik Conscious Holistically Integrated Krima (ACHIK) maming dakeba ra·piljawa ine parakataha.

Me·chik dolni Secretary Reche Chambugong Wa·ge-ni songbadna parakatani gitade, Meghalaya a·dokko man·chengaonin A·chikrangna chamgimin kamrangko chu·onga gita on·jahani gimin, A·chikrangni man·na nangenggipa bak rengsiko 40% ko tik ong•e, on·china raken dabiangkugen. Maina indita bilsina kingking A•chikrangni Mipal-ko ra•seke cha•achi A•chik jatko namen chonnikani ong•ahachim.

Garo Hills-o songdongenggipa A·chikrang, an·tangtangni man·na nangenggipa bak rengsiko man·jahani a·sel neng·nikanirangko man•enga. Job Reservation Policy-o A·chikrangna chamgimin bak rengsiko on·aniara A·chikrangni man·gnian ong·a, ine Reche Wa•ge parakataha.

High Court Job Reservation Policy-o nangchapgipa Roster System-ko ra·gatchina rai on·anian bilsi 50 batpile, A·chikrangni kosako ong·gija kal•akaniko mesokani ong·a. Uni gimin A·chikrang sakantian an·tangtangni bak rengsiko man·pana gita bilake ja•ku de•na aro apsan ku•mongna nanga ineba didiangaha.

ACHIK dolni minggipin dabianira, Tura-ko Winter Capital songchina dabianian mongsonggipa dabiani ong·enga aro iako chu·sokatkuja dipet dabianiko dontongjawa ineba Reche Chambugong Wa·ge parakataha.

Tura-ko Winter Capital ba Second Capital songchina dabianio Garo Hills-ni dingtang dingtang NGO dolrangba bakrimaniko on·engani gimin, ia dabianio Khasi Hills-ni NGO-rangba uamang baksa bakrimaniko on·pagen ine ACHIK Me·chik dolni Secretary, ka·donganiko parakataha.