Tura, April 4, 2023: Garo Hills-o gital bikotgipa, A•chik Conscious Holistically Integrated Krima (ACHIK) dol, Job Reservation Policy-ni Roster System-ko maming dakeba jujagija jakkalaniko nangnikenga ine ACHIK dolni jakrikra Ma Reche Chambugong Wa·ge koborna parakataha.
A·chik jat bilsi sotbongana an·tangtangni mipalko man·jaha, indiba jensalo iani bidingo High Court ba Katchari-ona ra·angahaon, High Court A·chik jatni job quota ba mipalko Meghalaya sorkari bilsi 50-na kingking sakgipinna ra·seke on·aha, uni gimin ua mipalrangko da·alo on·pilna nangenga ine parakataha.
A•chikrangna mipal on·pilaniko, ACHIK dol indin wate on·jawa, maina bilsi 50-na A·chik jatni man·gnirangko gipin jat ra·e kataha. Da·alo ia Roster System dongani gimin A·chik jat a·doko dongenggipa gipin jatna bate sorkarini kamrangko man·na gita nambegipa chol ong·aha ineba parakaha.
Adita u•igiparangni kobor on·ani gitade, badiaba bilsirango a·doko Nurse-rangko kam appoint ka·ani somoio ge 400 post-rangoniko A·chikrang sak 60-san man·aiaha. Da·alo Roster System-o pangchakgenchimode, post ge 340-ko A·chikrangna on·chengani ja•mansa gipin jatko kamo rakkina ba appoint ka·na nanggen ine dabiangskaha.
Unbaksana, ACHIK dol Tura-o Winter Capital-ko ba Sin•kari-ni tom•aniko ta·rake on•aniko nangengaha. Winter Capital Meghalaya-ni gnigipa A·dokni tom•aniko Tura-o jadok dakchina raken dabianggen ine parakataha.
Meghalaya A·doko man•chengaonin Tura-ko a·dokni gnigipa Capital ba Headquarter tarigen ine ku·rachakgimin gnang aro iako da·alonaba chu·sokate on•kuja.
Tura-o a·dokni headquarter-ko jadokna chong·motan, October jaoni March jaona aro Shillong-o April jaoni September jaona tom•anichi jat dolgittamna bang•en namgnirangko ra·bana man•gen. Iani bidingo ACHIK dol ku·rang on·ani aro ja·ku de·ani sal sokaha aro ia dabianiko dontongjawa ine Krima Council parakataha.