Shillong, April 11, 2023: A•doko niam gri koila cho•aniko aro koila salruraaniko pulisrang dontongatna bil man•a ine a•dokni Dakchakgipa Skotong Minister Prestone Tynsong aganaha.
A•doko Central Industrial Security Force (CISF)-rangko donana batede, Meghalaya Pulis-an ia kamko ka•na bil man•a, ine Preston Tynsong Sombar salo Reporter-rangni sing•anina aganchakaha.
“Anga Assembly-oba aganchakaha, pulisrang ia kamko ka•na bil man•genchimode, maina pulisrang salo konta 24 antio sal 7 kam ka•na man•ja. Apsandake da•o uamang dongjaode, namgijagipa kamrangko nie dongaiode, namjabata obostarang ong•naba gnang” ine Tynsong aganaha.
Court-ni niam gita, CISF dolko dona nanga ingipako uaba ra•chakaha.
Indiba “Anga da•o iani bidingo mamingkoba aganna man•jawa, sorkari Court-ko mol•moloba, Court ge•etaniko on•genma, on•jawama. Apsandake Additional Force-rangko ba agitchae chel•chakgipa sipai dolrangko on•dapchina Ministry of Home Affairs (MHA)-na aro Organisation-na lekka seataha. Indiba uamang Adfitional Force-rangko on•dapna man•jaha” ineba Tynsong agandapataha.