Baghmara, Mar 31, 2023: South Garo Hills a•jani dolsa NGO, Association for Democracy and Empowerment (ADE), Baghmara Zone, March 30 tariko Baghmara PWD Department-ni Executive Engineer-ko gronge lekka sedoangaha.
ADE-ni General Secretary Tigana N.Sangma-ni songbad-na u•iatani gitade, Baghmara town jangchio donggipa Dopagrang aro Bolsalgre rama namsrangjani gimin, ta•rake tarichina dabie lekka sedoangaha.
Ia ramarangni bidingo ADE-ni dilgiparang PWD-ni Executive Engineer-ko gronge agangrikahaon, Engineer bakan an•tangni ka•rimskarangko okamate, Dopagrang aro Bolsalgre ramako re•ange niechina ge•etaha. Indake kamko ka•na gita an•tangni Assistant Engineer-ko okamate, estimate-rangko ta•rake tarichina didiangaha.
Baghmara town jolrango rama namgijarangko tarina ta•raken kamrangko ka•anggen, ine Engineer ku•rachakahani ADE dilgiparang mittelpilskaani kattako parakataha.