Baghmara, Mar 18, 2023: Garo Students’ Union (GSU) South Garo Hills Zone, ta•rake NSC Company-ni Engineer aro Project Manager-ko ra•galchina dabiangaha.
GSU South Garo Hills Zone-ni General Secretary Sengrak T.Sangma-ni u•iata gitade, Baghmara-oni Ranikor-ona tariangenggipa State Highway sorokko name tarijani gimin raken jegalataha.
NSC Company, dingtangmancha Dambuk aro Rongara-ni gisepo donggipa Gaobar jolrango km 5-oni 10 mangna tarigipa sorok namsrangjachim. NSC Company baikamna gita sorokko tarijaha aro a•ani kosako chu•onga gita bitamin-rangko on•gija rariaha ineba janapataha. Ua sorok salsa ba salgnian baijawa ine NSC company-ni kamko jegalataha.
Songni manderang, NSC Company-ni sorok taria namgijako photo aro vedio ka•e, social media-rango gatatako niksoe, GSU re•ange nieahaon, NSC Company-ni kam namgijako nikna gita man•aha. Uni gimin NSC Company-ni Engineer aro Project Manager-ko ta•rake kamoniko ra•galchina GSU dabiangaha.
Uandakgipa Company-rang kam ka•ani a•sel Garo Hills-ni sorokrang namjaenga aro uandake kam ka•na changgijagipa Company-na pangnaba contract on•na nangja ine GSU didiataha.