Tura, Feb 8, 2023: Nomination ka•ani bon•kamgipa February 7 tarik Butbar salo a•dokni gitcham Skotong Minister aro TMC Legislature Party-ni dilgipa Dr Mukul Sangma Tikrikilla elakkao susana Tura DC Office-o Nomination file ka•aha.
Indake apsan salo South Tura elakkao susaenggipa BJP candidate Bernard N.Marak, North Tura-ni BJP candidate Adamkid M.Sangma aro Phulbari-ni NPP candidate AT Mondal nomination file ka•angaha.
Dr Mukul Sangma korbor ra•timgiparangna aganengon, South Tura, North Tura seato aro gipin elakarango apsan miksonganiko chu•sokatna kamko ka•giparang namen krengenga na•simang chu•sokaniko nikgen.
Da•alo A•chik a•songo ba Meghalaya a•doko gital chadamberang TMC-ni candidate ong•e, manderangna dangdike on•na re•chakataniko nikenga.Iarang pilakan mikkangchi dilgiparangko tarie donangani ong•a, jedakode A•chik a•songni dedrang su•drang aro dilgiparang mikkangchi jakra-jakasi, mikkang ki•sang uamango pangchake a•songko rikanio bakrime re•mikkangna man•gen.
Uni gimin chinga ka•donga manderang miksonganiko dal•e ra•gen, maina politic aro democracy-o indine agana gnang. “An•china on•gimin bilko, an•chingni mandeko watate, an•chingna dangdike on•a” uni gimin, ia miksonganiko chu•sokatna sakantian bakrimenga. Maina ia agenda saksa mandena ong•ja, indiba jat gimikni dingtangmancha nangnikaniko chu•sokatna aro jatko ra•dogen, jatko niksengatgen aro gipin a•songna bate, an•tangni a•dokko chigako niksengatna, mingsing minggamatna ku•mongani bilo chinga ja•ku de•enga.
Uni gimin chinga ka•donga, manderang dingtanganiko nangnike ku•monganio apsan bakrimenga, Meghalaya a•doko dingtanganiko man•chongmotgen aro ian manderangni ku•mongako mesokani sakki ong•gen, ine Dr Mukul Sangma aganaha.
“Chingni dakgrikanide, cha•bokaniko bon•atna dakgrikengani gimin cha•bokgiparangni kosako chinga chetelgen” ine Berand Marak aganaha.
NPP dilgiparangni agana gitade, Garo Hills-na bilongen dakjok aro dingtangmancha South Tura-o gittimantini ramarang, ringani chi aro Tura Beautification project-ko matchotaha ine agana, iani bidingo na•a aganna man•genma ine sing•anina, Bernard Marak indine aganaha. “Jeko Chief Minister inaugurate ka•aha, jekai Smart town, PA Sangma Stadium aro Ganol Hydro Power Project, iarang gimikan ma•mong sorkarini on•gipasa ong•a, Narendra Modi-sa biming man•na kraachim, indiba Chief Minister an•tangsa biming man•enga. Chief Minister-ni initiative-o ge•saba project dongja, indiba an•tang credit ra•enga manderang iako ma•sia. Iarang gimikan ma•mong sorkarini on•gipasa. Krustian-rangni kosako jangbingbanganina maming dakeba kenani dongja, Meghalaya-o bang•bata BJP candidate-rangan Kristian ong•a. Kristianrang gimik obostako pangnan naljoke rakkigen aro gipin state-rango ong•genchimoba, Kristian state-ni BJP MLA-rang gimikan ku•rang on•gen. Iako chinga dingtangmancha kang•kare kae ra•manaha aro ku•rachake ra•enga” ine Tura-ni MDC aganaha.
Na•a samingmancha dakgrikani ong•gen ine sing•on, candidate-rangde bang•a, indiba mongsongbate CM baksa dakgrikani ong•gen, indiba chinga CM-ko amaigen.Mija MDA sorkari ong•mittingo nang•ko rim•e jailo dongjok, iani bidingo na•a mamingba ong•jawama ine sing•on, iarang maming dakeba affect ong•jawa,maina manderang gimikan angko tol•e case ka•a ine ma•sia, maina an•tangni political carrier-na kenesa angko kal•aka. Jekon Court ma•sie angna bail on•aha aro manderang angna support ka•a, uni gimin mikkangchi darangnaba indakgipa obostarang ong•jachina anga an•tangba kang•kare kae kamko ka•anggen” ineba Bernard Marak aganaha.